Екібастұзда мектеп оқушыларының құқықтық мәдениеті квест арқылы қалыптастырылуда

Екібастұз қаласында «Заң және тәртіп» тұжырымдамасы аясында «Самғау» балалар шығармашылығы орталығында қалалық құқықтық квест өтті. Оған қала мектептерінен шамамен 1500 оқушы қатысты. Қатысушылар үшін құқықтық тақырыптарды ойын, пікірталас және тәжірибелік тапсырмалар арқылы талқылауға мүмкіндік беретін 11 интерактивті алаң ұйымдастырылды.

Оқушылар спорттық-құқықтық ойындарға қатысып, кейстерді талқылады, стратегиялық ойындарда өз қабілеттерін сынап көрді және «Прокурор мінбері» форматындағы ашық диалог барысында сұрақтарын қойды. Іс-шара аясында Екібастұз қаласының прокуроры Елнұр Нұрмаханұлы жастар арасындағы құқық бұзушылықтардың алдын алуға бағытталған «Айқын нәтиже» жобасын таныстырды. Ал Екібастұз қалалық полиция басқармасының бастығы, полиция подполковнигі Төлеген Құдайбергенов «Қауіпсіз шағын аудан» қалалық жобасын таныстырды.

Бағдарлама шығармашылық және танымдық бағыттағы алаңдарды да қамтыды. Олардың қатарында «Адалдық ағашы» арт-платформасы, шахмат пен ұлттық ойындар негізіндегі құқықтық стратегиялар, сондай-ақ IT және жасанды интеллект саласына арналған таныстырылымдар ұйымдастырылды.