Екібастұз командасы Alem Tech Fest 2026 фестивалінде өңір намысын лайықты қорғады

Екібастұз қаласындағы №21 ресурстық орталықтың «Time Diggers» командасы робототехника, жасанды интеллект, STEM және инженерлік шығармашылық бағытындағы Қазақстан мен Орталық Азиядағы ең ірі фестиваль — Alem Tech Fest 2026 шарасына қатысты. Фестивальге Қазақстан, Қырғызстан, Өзбекстан, Түрікменстан, Эстония, Гонконг және Вьетнам елдерінен 5000-нан астам қатысушы жиналды.

Фестивальдің басты оқиғаларының бірі — FIRST халықаралық бағдарламасы аясында өткен Central Asia FIRST Championship чемпионаты болды. Биыл қатысушылар «Археология» тақырыбы бойынша инженерлік жобаларын қорғады. «Time Diggers» командасы бірнеше іріктеу кезеңінен өтіп, еліміздің үздік командаларымен қатар жоғары дайындық деңгейін көрсетті.

Жас қатысушылар бірнеше тарихи кезеңді біріктіретін интерактивті археологиялық ойынды ұсынды. Ойын алаңы мен тапсырмалар модельдеу, логикалық ойлау, конструкторлармен жұмыс және робототехника элементтеріне негізделген. Жобаның бірегейлігі — ойынның мектеп жасына дейінгі балалардың өз қолымен жасалуы және археологиялық сюжет арқылы STEAM-білім беру элементтерін: зерттеу, құрастыру, тәжірибе жасау және командалық өзара әрекеттестікті біріктіруі. Ойын барысында бала жай ғана ойыншы емес, зерттеуші әрі жаңалық ашушы рөлін атқарады.

Екібастұз командасының халықаралық технологиялық фестивальге қатысуы өңірде инженерлік ойлауды дамыту мен ерте кәсіби бағдар беруге бағытталған білім беру бастамаларының нақты нәтижесін көрсетеді.