Павлодарлық құқық қорғаушылар қаржы пирамидаларының негізгі белгілерін атады

Тек соңғы екі жылдың ішінде Павлодар облысы бойынша Экономикалық тергеп-тексеру департаментінің қызметкерлері бірден төрт қаржы пирамидасының жолын кесті. Қаржы пирамидаларына қарсы күрес туралы @pavlodar.rsk алаңында өңірлік ЭТД өкілдері — бірінші жедел басқарманың басшысы Жоламан Киналбеков пен ұйымдастыру-бақылау басқармасының басшысы Арман Ізбастинов айтып берді. Олардың мәліметінше, Павлодар облысында төрт қаржы пирамидасының әрекетінен 300-ге жуық адам зардап шеккен. Сөз «А» тұтыну кооперативі, «HAS» және «Автолюкс» қаржылық және инвестициялық пирамидалары, сондай-ақ «Takorp» жобасы сияқты ұйымдар туралы болып отыр. Олардың ұйымдастырушылары мен менеджерлеріне қатысты 15 қылмыстық іс қозғалды. Экономикалық тергеп-тексеру департаментінің өкілдері қаржы пирамидаларының негізгі белгілерін атап көрсетті: 1. Лицензияның және ашықтықтың болмауы. Ұйымның ҚР Қаржы нарығын реттеу және дамыту агенттігінен депозиттер қабылдауға немесе бағалы қағаздармен жұмыс істеуге берілген лицензиясы болмайды. Сонымен қатар, компанияның қаржылық жағдайы туралы ақпарат жасырылады, меншікті активтері мен ақшаның нақты неден табылатыны туралы түсінік болмайды. 2. Қысқа мерзімде аса жоғары пайда алуға кепілдік беру. Алаяқтар нарықтық көрсеткіштерден айтарлықтай жоғары табыс (мысалы, айына 20–50% және одан жоғары) уәде етеді. Сонымен қатар, олар нақты инвестицияларда жоғары табыс әрдайым жоғары тәуекелмен байланысты екеніне қарамастан, ешқандай қауіп жоқ деп сендіреді. 3. Агрессивті жарнама. Алаяқтар «табысты өмір» бейнесін жасау үшін әлеуметтік желілерді, мессенджерлерді және инфлюенсерлерді белсенді түрде пайдаланады. Жарнама жарқын ұрандарға, ақша жиынтығын, қымбат көліктерді көрсетуге және «бір аптада өміріңді өзгерт» деген уәделерге негізделеді. Бұл ретте әлеуетті салымшыларды «соңғы мүмкіндік» немесе «жобадағы орындардың шектеулілігі» туралы психологиялық айла-тәсілдермен шешім қабылдауға асықтырады.