Павлодарда цифрлық ХҚКО пайда болады

Сала мамандары цифрлық кеңсені жыл соңына дейін іске қосуға уәде беріп отыр. Болжам бойынша, ол Ген. Дүйсенов көшесі, 80 мекенжайында орналасқан СуперХҚКО негізінде жұмыс істейтін болады. «Азаматтарға арналған үкіметтің» жоспарлары туралы @pavlodar.rsk алаңында мемлекеттік корпорацияның өңірлік филиалы басшысының міндетін атқарушы Алтай Қайдаров айтып берді. Оның сөзінше, цифрлық ХҚКО-дағы барлық қызметтер өзіне-өзі қызмет көрсету форматында ұсынылады. Кеңсе клиенттері қызметтерді компьютерлер мен терминалдар арқылы өз бетінше ала алады, ал қызметкерлер тек бағыт-бағдар беріп, көмектесуге дайын кеңесшілер ретінде әрекет етеді. - ⁠Егер осыдан 20 жыл бұрын біз қазақстандықтарды ХҚКО-ларға өзіміз шақырсақ, енді барлық мемлекеттік қызметтерді онлайн форматқа көшіріп жатырмыз, - деді спикер. - Яғни, қазір біз адамдардың халыққа қызмет көрсету орталықтарына келу тәжірибесінен алшақтауы үшін кері бағытта қозғалып келеміз. Бүгінде Павлодар облысында мемлекеттік қызметтердің шамамен 70-80%-ы қашықтан көрсетіледі. Болашақта жылжымайтын мүлікті тіркеу сияқты күрделі қызметтердің өзі онлайн форматқа ауыстырылады. Өткен жылы Павлодар облысының халыққа қызмет көрсету орталықтары барлығы 566 мыңнан астам мемлекеттік қызмет көрсетті. Тағы 486 мыңнан астам қызметті өңір тұрғындары ХҚКО-лардың өзіне-өзі қызмет көрсету секторлары арқылы алды.

Фото: Gemini