Павлодарда тегін қазақ тілі курстарының бірінші маусымы бастау алды

Облыс мәдениет, тілдерді дамыту және архив ісі басқармасы Қазақстан Республикасында тіл саясатын дамытудың 2023-2029 жылдарға арналған тұжырымдамасын жүзеге асыру шеңберінде барлық санаттағы азаматтар үшін жыл сайын қазақ тілін тегін оқыту курстарын өткізеді.

Осыған орай Павлодарда ағымдағы жылдың 16 қаңтарында Облыс мәдениет, тілдерді дамыту және архив ісі басқармасының ұйымдастыруымен «Ана тілі» орталығында жоғарыда аталған Тұжырымдаманы жүзеге асыру мақсатында барлық санаттағы азаматтарға арналған тегін қазақ тілі курстарының бірінші маусымы бастау алды.

Курстың мақсаты – тыңдаушыларды қазақ тілінде жиі кездесетін сөздерді қолдана отырып, еркін және дұрыс сөйлеуге үйрету, сондай-ақ қазақ тілінің орфографиялық, фонетикалық, морфологиялық, лексикалық нормаларын меңгерту болып табылады.

Аталған курсқа тілді меңгеру деңгейі әртүрлі және әртүрлі жастағы тыңдаушылар қатысуда. Тілді оқыту қарапайымнан күрделіге дейінгі деңгейлер бойынша жүргізіледі. Сабақтар аптасына бес рет, екі ай бойы өткізіледі.

Оқыту барысында тыңдаушылар күнделікті өмірде кездесетін қарапайым қарым-қатынас фразаларын қолдануды, қарапайым мәтіндерді аударуды, жай сөйлемдерді құрастыруды үйренетін болады.

Курстың соңында тыңдаушыларға сертификат табысталатын болады.

Бүгінгі күні облысымыздың қала, аудандарында қазақ тілін тегін оқыту курстары басталып, жұмыстар жүргізілуде.

Тегін қазақ тілі курстарына жазылуға және қосымша ақпаратты 61-84-88 телефоны арқылы алуға болады.

Жалпы 2024 жылы мемлекеттік тілді үйретуге бағытталған облыс көлемінде «Тіл керуені», қызмет көрсету өкілдеріне арналған тілдік «Start up», «Қазақ тілі онлайн курсы» және «Жағдаяттық қазақ тілі» атты жобалар мен курстар іске асырылды.

Өткен жылы облыс бойынша қазақ тілінің тегін курстарымен 2294 адам қамтылған болатын.