Бүгін Ақсу өңірінің жалғыз Ұлы Отан соғысының ардагері Василий Гаврилович Московченко 98 жасқа толды.

Ол 17 жасында Отан қорғауға аттанып, Қиыр Шығыс майданында 31-ші артиллериялық полктің құрамында шайқасып, Кеңес-Жапон соғысына қатысқан.

Жеңістен кейін алты жыл өткен соң, Василий Гаврилович туған жеріне оралып, 48 жыл бойы бейбіт еңбекке өз өмірін арнады.
Оның ерлігі II дәрежелі Отан соғысы орденімен және көптеген басқа да марапаттармен атап өтілді.

Облыс әкімі А.Қ. Байханов атынан құттықтау хатын табыстап, ардагерді туған күнімен құттықтадық, бейбіт аспан үшін алғыс білдіріп, мықты денсаулық, ұзақ ғұмыр және амандық тіледік.