Қараспан ауыл округіндегі әлеуметтік және инфрақұрылымдық нысандарды аралау барысында атқарылып жатқан жұмыстармен таныстым

Мәслихат төрағасы ретінде аудан әкімі Азат Оралбаевпен бірге Қараспан ауыл округіндегі бірқатар маңызды нысандарды аралап, округте жүзеге асырылып жатқан жұмыстардың барысымен таныстым. Бұл сапардың мақсаты – ауыл тұрғындарының өмір сүру сапасын арттыруға бағытталған жобалардың жүзеге асу деңгейін бақылау және халықтың өзекті мәселелерімен жақын танысу болды.

Алдымен Берген Исаханов ауылындағы жаңадан пайдалануға берілген 100 орындық Өнер мектебіне бардық. Бұл мәдениет ошағы – ауыл балаларының шығармашылық қабілетін дамытып, өнерге деген құлшынысын оятуға арналған маңызды мекеме. Мектепте оқушыларға сурет салу, би, гимнастика және домбыра секілді бағыттар бойынша дәрістер жүргізіледі. Жергілікті жастардың бос уақытын тиімді өткізуге және өнер саласында жетістікке жетуіне жағдай жасайтын бұл мекеме – ауыл мәдениетінің дамуына зор үлес қоспақ. Ауыл тұрғындары бұл мектептің ашылуын үлкен қуанышпен қабылдағанын атап өтті.

Келесі кезекте Қараспан және Жаңатұрмыс ауылдарындағы суармалы егіншілікке қажетті инфрақұрылыммен таныстық. Атап айтқанда, осы ауылдарды тіршілік нәрімен қамтамасыз етіп отырған қазанарық каналындағы бетондау жұмыстарының барысын көрдік. Аталған жұмыстар су тасымалының тиімділігін арттырумен қатар, алдағы суару маусымына дайындықты қамтамасыз етпек. Бұл жоба ауыл шаруашылығымен айналысатын шаруалар үшін өте маңызды болып табылады. Каналдарды жаңарту арқылы су шығынын азайтып, өнім көлемін арттыру көзделіп отыр.

Сонымен қатар, Қараспан, Бадам және Бөржар ауылдарының маңындағы марокко шегірткесіне қарсы жүргізіліп жатқан химиялық өңдеу жұмыстарымен де таныстық. Бұл зиянкес жыл сайын ауыл шаруашылығы алқаптарына айтарлықтай зиян келтіріп отырғаны белгілі. Осыған байланысты мамандандырылған техникалар мен қажетті препараттар жұмылдырылып, алдын алу шаралары қарқынды түрде жүргізілуде. Арнайы мамандармен кездесіп, өңдеу аумағының көлемі, пайдаланылып жатқан құрал-жабдықтар мен химиялық заттардың қауіпсіздігі бойынша нақты мәліметтер алдық. Бұл жұмыстардың басты мақсаты – егін шаруашылығына келер зиянның алдын алу және биылғы егіс маусымын жоғары деңгейде өткізу.

Жалпы алғанда, бұл сапар Қараспан ауылдық округіндегі атқарылып жатқан жұмыстардың жүйелі жүргізіліп жатқанын көрсетті.

Алдағы уақытта да халық игілігі үшін қолға алынған бастамаларды қолдап, олардың нәтижелі жүзеге асуын қадағалау басты назарымызда болады.