Ордабасы ауданында 84 тұрғынға көптен күткен пәтер берілді

Елімізде тұрғындардың әлеуметтік жағдайын жақсарту мақсатында мемлекет тарапынан ауқымды бағдарламалар жүзеге асырылуда. Президенттің тапсырмасына сәйкес, баспанамен қамту мәселесі кезең-кезеңімен шешіліп, халықтың тұрмыс сапасын арттыру бағытында жүйелі шаралар қабылдануда. Осы орайда, Ордабасы ауданында тұрғын үй құрылысы қарқынды түрде жүргізіліп, халықтың игілігіне берілуде.

Бүгін Ордабасы ауданы үшін ерекше күндердің бірі болды. Аудан орталығы Темірлан елді мекеніндегі жаңадан бой көтерген Самал мөлтекауданында көптен бері баспана кезегінде тұрған 84 тұрғынға 3 қабатты жаңа тұрғын үйлерден пәтер кілттері табысталды. Бұл қуанышты сәтке аудан және облыс басшылары, мәслихат депутаттары, ардагерлер кеңесінің өкілдері мен жаңа қоныс иелері қатысты.

Салтанатты шараға қатысушылардың құттықтауы

Жаңа қоныс иелерін құттықтау үшін арнайы келген аудандық мәслихат төрағасы Бақдәулет Жұмабеков тұрғындарға жылы лебізін білдіріп, жаңа үйлердің жайлы әрі берекелі болуын тіледі. Сондай-ақ, аудан әкімі Азат Оралбаев, облыстық мәслихат депутаттары Ғани Райымбеков пен Дулат Әбіш, аудандық ардагерлер кеңесінің төрағасы Бостандық Жәкей да сөз сөйлеп, баспаналы болған азаматтарды құттықтады.

Қоныстой иелері өз алғыстарын білдіріп, мемлекет тарапынан көрсетіліп жатқан қолдаудың маңыздылығын атап өтті. Пәтер иелері үшін бұл күн – көптен күткен қуанышты сәт, өйткені олардың арманы орындалып, өз баспаналарына қол жеткізіп отыр.

Жаңа қоныс – жайлы орта

Бүгінгі шара аясында Самал мөлтекауданының тұрғындары үшін абаттандыру жұмыстары да жүргізілді. Жаңа үйлердің ауласында көгалдандыру шарасы ұйымдастырылып, тұрғындармен бірге жас көшеттер отырғызылды. Бұл жұмыстар мөлтекауданда қолайлы экологиялық орта қалыптастыруға және тұрғындардың жайлы өмір сүруіне оң ықпал етеді.

Ордабасы ауданы әкімдігінің мәліметінше, қазіргі уақытта аудан бойынша 2803 азамат тұрғын үй кезегінде тұр. Мемлекеттік бағдарламалар аясында бұл мәселе кезең-кезеңімен шешіліп, халықты қолжетімді баспанамен қамту жұмыстары жалғасуда.

Тұрғындардың әлеуметтік жағдайын жақсарту және тұрғын үймен қамтамасыз ету – мемлекеттік саясаттың басым бағыттарының бірі. Осы орайда, алдағы уақытта Ордабасы ауданында жаңа үйлердің құрылысы жалғасып, кезекте тұрған азаматтарға пәтер беру процесі жоспарлы түрде жүзеге асырылатын болады.

Ордабасы ауданында баспана мәселесінің оң шешім тауып жатқаны – өңірдегі әлеуметтік-экономикалық дамудың жарқын көрінісі. Жаңа пәтер иелеріне құтты қоныс, берекелі өмір тілейміз!