Президент Жолдауы – ел дамуының стратегиялық бағдары
Президент Жолдауы – ел дамуының стратегиялық бағдары 
Ордабасы ауданында Мемлекет басшысы Қасым-Жомарт Тоқаевтың 8 қыркүйекте жариялаған «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауынан туындайтын міндеттер талқыланды.
Жиынға аудан әкімі Азат Оралбаев, облыстық мәслихаттағы «AMANAT» партиясы фракциясының жетекшісі Алтынсары Үмбетәлиев, аудандық мәслихат төрағасы Бақдәулет Құрманбекұлы, сондай-ақ ауданның беделді азаматтары мен мекеме басшылары қатысты.
Аудандық мәслихат төрағасы Бақдәулет Құрманбекұлы Мемлекет басшысы атап өткен жасанды интеллектіні дамыту мәселесіне ерекше тоқталды.«Жасанды интеллект – уақыт талабы. Бұл тек ІТ саласына ғана емес, экономика, білім беру, денсаулық сақтау және аграрлық секторды жаңа деңгейге көтеретін маңызды тетік. Президенттің тапсырмасына сәйкес, біз аудан деңгейінде де цифрлық сауаттылықты арттырып, жастардың осы салаға қызығушылығын күшейтуге және мемлекеттік қызмет көрсетуде жаңа технологияларды тиімді қолдануға күш салуымыз қажет. Бұл – Қазақстанның озық елдер қатарына қосылуының алғышарты», – деді ол.
Жиында сөз алғандар Жолдаудағы негізгі басымдықтар туралы ойларымен бөлісіп, өз ұсыныстарын білдірді. Қорытынды сөзінде «AMANAT» партиясы Түркістан облыстық филиалының төрағасы Алтынсары Үмбетәлиев партия жүзеге асырып жатқан «Жер аманаты», «Қарызсыз қоғам», «Ауыл аманаты» жобаларының нақты нәтижелеріне тоқталды.
Президент Жолдауындағы міндеттер – ел дамуының жаңа кезеңіне жол ашатын тарихи шешімдер. Бұл істе әрбір азаматтың белсенділігі мен жауапкершілігі қажет.Бірлік пен іскерлік болса – алынбайтын асу жоқ! 