Түркістан облыстық мәслихатының төрағасы аудандық және қалалық мәслихат төрағаларымен кездесу өткізді

Түркістан облыстық мәслихатының төрағасы Нұралы Әбішов аудандық және қалалық мәслихат төрағаларымен жұмыс кездесуін өткізді.

Кездесу барысында Нұралы Әлмаханұлы ҚР Парламенті Сенатының Төрағасы Мәулен Сағатханұлы Әшімбаевтың төрағалығымен өткен «Бір ел – бір мүдде» депутаттық тобының кезекті отырысында көтерілген өзекті мәселелерге тоқталды. Атап айтқанда, еліміздегі бейбітшілік пен келісімді одан әрі нығайту, Қазақстан халқы Ассамблеясының саяси-тарихи рөлі жөнінде кеңінен түсіндірілді.

Жиынның негізгі мақсаты – ел ішіндегі қоғамдық келісім мен бірлікті сақтау, депутаттық корпустың этномәдени бірлестіктермен өзара іс-қимылын тиімді ұйымдастыру және үйлестіру мәселелерін талқылау болды.

Өз сөзінде облыстық мәслихат төрағасы Нұралы Әбішов бұл бағытта мәслихат төрағалары мен депутаттарының маңызды рөл атқаратынын атап өтті.

– Халықтың сенімі мен аманатын арқалау – үлкен жауапкершілік. Бұл міндетке немқұрайлы қарауға болмайды. Әрбір депутат өзінің артында тұрған сайлаушылардың үмітін ақтау үшін барлық істе белсенді болуы тиіс. «Бір ел – бір мүдде» қағидасы – елдің бірлігі мен ынтымағын бекемдеудің негізгі тірегі. Қоғамдағы этносаяси ахуал, ішкі тұрақтылық пен ынтымақтастық құндылықтарын арттыру мәселелері ҚР Парламенті Сенатының Төрағасы Мәулен Әшімбаевпен және ҚР Мемлекеттік Кеңесшісі Ерлан Қаринмен өткен кездесулерде де кеңінен талқыланды. Біз де осы бағытта үлкен жауапкершілікті сезіне отырып, бірлесе нәтижелі жұмыс істеуге тиіспіз, – деді Нұралы Әлмаханұлы.

Кездесу барысында елді мекендерге атау беру және ескерткіштер орнату тәртібі, сондай-ақ депутаттардың этикасы жөніндегі мәселелер қаралды. Бұл бағытта облыстық мәдениет басқармасы тілдерді дамыту және ономастика бөлімінің басшысы Нұргүл Жақсылықова, тарихи-мәдени құндылықтарды қорғау бөлімінің басшысы Омар Жексенбаев және облыстық мәслихат аппаратының басшысы Мақсат Исаев баяндама жасады.

Сонымен қатар, жиын барысында аудан және қала аумақтарындағы елді мекендерді сапалы электр энергиясымен қамтамасыз ету мақсатында «Оңтүстік Жарық Транзит» ЖШС-мен атқарылатын жұмыстарды үйлестіру, «Жергілікті өзін-өзі басқару институтының тиімділігін арттыру» тақырыбындағы семинар өткізу және кіші футболдан турнир ұйымдастыру мәселелері де талқыланды.