Гранттарға өтінім қабылдау басталады
Құрметті Тимирязев ауданының тұрғындары!
2025 жылғы 11–22 тамыз аралығында Business.enbek.kz порталы арқылы жаңа бизнес-идеяларды іске асыруға арналған гранттарды алуға 2-лек бойынша өтінімдер қабылдау басталады.
Гранттар өтеусіз негізде беріледі. Негізгі мақсаты – жаңа бизнесті бастау және дамыту.
Грант мөлшері 400 АЕК-ке дейін (1 572 800 теңге). Әр қатысушы грантты тек бір рет қана ала алады.
Грант қаражаты жаңа кәсіп бастаушыларға өз бизнес-әлеуетін ашуға, өндірісті жолға қоюға және дамытуға, соның арқасында тұрақты табысқа ие болуға мүмкіндік береді.
Өтінім беру үшін:
- Business.enbek.kz порталына тіркелу;
- грант алу шарттарына сәйкестігін тексеруден өту;
- бизнес-жоспар үлгісін жүктеп алып, толтырып, порталға жүктеу;
- өтінім нысанын толтырып, ЭЦҚ кілтімен қол қою қажет.
Интернетке немесе компьютерге қолжетімділік болмаған жағдайда, өтінімді Халыққа қызмет көрсету орталықтары мен мансап орталықтарының өз-өзіне қызмет көрсету аймақтарында беруге болады.
Грант алу үшін бірқатар талаптарды сақтау қажет. Жаңа бизнес-идеяларды іске асыруға грант алуға үміткер бола алады:
- тіркелген жұмыссыздар;
- жеке кәсіпкерлер (тіркелгеніне 3 жылдан аспаған).
Сонымен қатар үміткер келесі әлеуметтік санаттардың біріне жатуы тиіс:
- мүгедектігі бар тұлғалар;
- "қандас" мәртебесі бар азаматтар;
- өңіраралық қоныс аударушылар;
- аз қамтылған отбасылардың мүшелері;
- көпбалалы отбасы мүшесі (жұбайы/жұбайысы);
- мүгедек баланы тәрбиелеп отырған тұлға (жұбайы/жұбайысы);
- асыраушысынан айырылу бойынша жәрдемақы алушылар.
Үміткердің «Бастау Бизнес» жобасы аясында кәсіпкерлік негіздері бойынша оқудан өткендігі туралы (3 жылдан аспаған мерзімде) сертификаты болуы қажет.
Грант беру рәсімдерінің ашықтығын қамтамасыз ету, адами факторды азайту және өтініш берушілерге қолайлы жағдай жасау мақсатында гранттарды беру үдерісі толықтай электрондық форматқа ауыстырылды. Грант алуға өтініштер тек Business.enbek.kz порталы арқылы – бірыңғай терезе қағидаты бойынша қабылданады.
Грантты келесі мақсаттарға пайдалануға болады: қажетті құрал-жабдықтар, еңбек құралдары, технологиялық жабдықтар, үй жануарлары, ірі және ұсақ мал, құстар, көшеттер, бұталар, тұқымдар, көшет алу және үй-жайды жалға алу ақысына төлеу.
Гранттар келесі мақсаттарға берілмейді: тұтынушылық мақсаттар, несие қарыздарын өтеу, тұрғын үй сатып алу немесе салу, жер телімдерін сатып алу, акцизделетін өнім өндіру.
Гранттар еңбек мобильділігі орталықтары арқылы, грант алуға үміткерлердің өтініштерін қарау жөніндегі аудандық комиссия шешімінің негізінде беріледі.
Үміткерлер комиссия отырысында өздерінің бизнес-жобасын таныстырады. Комиссияның әрбір мүшесі бизнес-жоспарды келесі критерийлер бойынша бағалап, бағалау парағын толтырады:
– бизнес-идеяның бәсекеге қабілеттілігі,
– өткізу нарықтарының зерттелу деңгейі,
– жобаның қаржылық өміршеңдігі,
– үміткердің кәсіпкерлік дағдыларының деңгейі,
– жаңа жұмыс орындарын құру.
Осылайша, грант беру туралы шешім комиссиямен және бизнес-жобалардың әзірлену деңгейі бойынша нақты бағалау өлшемшарттары негізінде қабылданады.
Комиссия шешімі үміткердің Порталдағы жеке кабинетіне жолданады. Комиссия оң шешім қабылдаған жағдайда, үміткер банк реквизиттерін ұсынып, шартқа қол қояды және одан әрі қаражаттың мақсатты пайдаланылуы туралы есепті тоқсан сайын электронды түрде жүктеп отырады. Бұл рәсімдердің барлығы электрондық форматта, еңбек мобильділігі орталығына немесе оның филиалдарына (карьерлік орталықтарға) бармай-ақ жүзеге асырылады.
Барлық сұрақтар бойынша Тимирязев ауданы мансап орталығының филиалына келесі телефондар арқылы хабарласуға болады: 2-18-00, 2-11-10.