ТҮРКІСТАН ОБЛЫСЫНДА 112 ШАҚЫРЫМ КАНАЛ ТАЗАЛАНДЫ

Түркістан облысында суару маусымына дайындық аясында каналдарды тазалау жұмыстары қарқынды жүріп жатыр. «Қазсушар» мекемесінің Түркістан облысы бойынша филиалы 112 шақырымды құрайтын 57 каналды механикалық әдіспен тазалау жұмысын жүргізді. Биылғы жоспар бойынша жалпы ұзындығы 1000 шақырым болатын каналдарды тазалау жұмыстары жүргізілмек. Бұл жұмыстар үшін арнайы техникалар жұмылдырылып, суару маусымына дайындық басталды.

Сонымен қатар Ақылбексай су қоймасының аумағында өрт қауіпсіздігін сақтау мақсатында және тұрғындардың су қоймаға өтіп кетпеуі үшін 1240 метр арық қазылды. Келес ауданында орналасқан Ақылбексай су қоймасы жазық жерде орналасқандықтан аумағына жеңіл автокөліктер кіріп демалыс өткізіп жатады. Бұл мәселені алдын алу және өрт қауіпсіздігін сақтау мақсатында тиісті жұмыстар жүргізілуде. Су қоймасының сыйымдылығы – 25 млн. текше метрді құрайды, ал ұзындығы 1,7 шақырым.

Түлкібас ауданы аумағындағы Жаманжар каналының 1800 метр жері механикалық тазартудан өтті. Каналдың жалпы ұзындығы 8 км, ауданда 211 га жерді суғаруға қауқарлы. Су өткізу қабілеті 900 л м/с. Бүгінде облыс аумағындағы каналдардың тазалығы жіті бақылауда. Механикалық тазарту жұмыстары жалғасуда.

Сонымен қатар «Қазсушар» РМК Түркістан филиалының теңгеріміндегі В-15 және В-24 каналдарына келетін су көлемі артты. Сарыағаш өндірістік бөлімшесі аумағындағы аталған каналдарға босатылған судың көлемі аз болғандықтан, «Қазсушар» РМК Түркістан филиалының директоры Қазыбек Бедебаев Өзбекстан Республикасына мамандар жіберіп, судың көлемін ұлғайтты. Қазіргі таңда күндіз-түні кезекшілік ұйымдастырылып, каналдар арқылы ағып келген қоқыстар тазартылуда. Шаруалардың өтініштері орындалуда.

Түркістан облысы әкімінің баспасөз қызметі