ТҮРКІСТАН: ХАЛЫҚПЕН КЕЗДЕСУДЕ АРЫС ҚАЛАСЫН ДАМЫТУ ЖОЛДАРЫ ТАЛҚЫЛАНДЫ

Түркістан облысының әкімі Нұралхан Көшеров бекітілген кестеге сай Арыс қаласына барып, халықпен кездесті. Жеке қабылдау өткізіп, елдің өтініштері мен ұсыныстарын тыңдады. Арыс қаласын дамыту жұмыстары мен алдағы жоспарлар туралы баяндады.

– Өздеріңізбен жүздесіп, ұсыныс-пікірлеріңіздщі тыңдау үшін арнайы келіп тұрмын. Мәселелерді айтып, еркін пікір алмасамыз. Мемлекет басшысы Қасым-Жомарт Кемелұлы өңірлерді дамыту бойынша тапсырмалар бергенін білесіздер. Осы бағытта жұмыстар жанданып жатыр. Арыс – тоғыз жолдың торабында орналасқан, еліміздің теміржол тарихында ерекше орны бар шаһар. Бүгінде еліміздің көліктік-логистикалық инфрақұрылымы дамыған маңызды орталықтардың бірі. Арыс қаласында іске асырылып жатқан мемлекеттік жобалар мен бағдарламаларға қысқаша тоқталсам, «Ауыл – Ел бесігі» жобасы аясында 2024 жылы 4 елді мекенде 775,5 млн. теңгені құрайтын 5 жоба іске асырылды. Нәтижесінде 2 елді мекенінде ауыз су жүйесі күрделі жөндеуден өткізіліп, пайдалануға берілді. 7,5 шақырымды құрайтын 10 көше орта жөндеуден өтті. Бір спорт нысаны тапсырылды. «Ауыл аманаты» жобасы аясында өткен жылы 162 млн. теңгеге 24 жоба қаржыландырылса, биыл 1,2 млрд. теңгеге 140 жобаны қаржыландыру жоспарланып отыр. Шаһарда жалпы өңірлік өнім көлемі 95,2 млрд. теңгені құрап, 8 пайызға өсті. Шағын және орта бизнес субъектілерінің саны 2,7 пайызға артқан. Арысты жан-жақты дамыту жұмыстары жағасады. Әсіресе, инвестиция тарту, жұмыс орындарын ашу, ауыл шаруашылығын дамыту маңызды. Ол үшін жергілікті әкімдік пен тұрғындар бірлесе жұмыс атқаруы тиіс, – деген Нұралхан Көшеров қала әкіміне бірқатар мәселе бойынша тапсырмалар берді. Сонымен бірге «Таза Қазақстан» бағдарламасын жалғастыруды тапсырды.

Қала әкімі Қайсар Маңқараевтың есебінен кейін тұрғындар облыс әкіміне сұрақтарын қойып, өтініштері мен ұсыныстарын жеткізді. Инфрақұрылым, кәсіпкерлікке қолдау, әлеуметтік мәселе, тұрғын үй және өзге де салалар бойынша түйткілдер тарқатылды. Өңір басшысы мен жауапты басқарма басшылары тарапынан жауаптар беріліп, мәселені шешу жолдары ұсынылды.

Халықпен кездесуден соң облыс әкімінің жеке қабылдауы өтті. Тұрғындар көшені жарықтандыру, балалар ойын алаңшасын салу, ғаламтор, денсаулық, жұмыспен қамту, спортты дамыту мәселелерін көтерді. Өңір басшысы өтініштер мен ұсыныстар бақылауға алынып, тиісті жұмыс жүретінін жеткізді. Жалпы кездесу мен жеке қабылдау үш сағаттан астам уақытқа созылып, тұрғындар көкейдегі ойларын толық айта білді.

Айта кетейік, облыс әкімі Нұралхан Көшеровтің облыс тұрғындарымен кездесулері барлық аудан, қалада жалғасын табады. Жеке қабылдауға «еOtinish» бірыңғай базасы арқылы немесе «Ашық әкімдік» кеңсесіне келіп, жазбаша өтініш тастау арқылы жазылуға болады.

Түркістан облысы әкімінің баспасөз қызметі