ТҮРКІСТАН: ШТАБ ОТЫРЫСЫНДА КОНГО-ҚЫРЫМ ҚЫЗБАСЫНЫҢ АЛДЫН АЛУ МӘСЕЛЕСІ ҚАРАЛДЫ

Түркістан облысында Конго-Қырым қызбасына қарсы штаб отырысы өтіп, бірқатар маңызы мәселелер қаралды. Облыс әкімінің орынбасары Бейсенбай Тәжібаевтың төрағалығымен өткен жиынға Облыстық санитариялық-эпидемиологиялық бақылау департаменті, Денсаулық сақтау басқармасы, Түркістан облысының ветеринария басқармасы, «ҰСО» ШЖҚ РМК Түркістан облысы бойынша филиалы, облыс бойынша дезинфекция орталығы және онлайн байланыс арқылы аудан, қала әкімдерінің салаға жауапты орынбасарлары қатысты.

Облыс әкімінің орынбасары көтеріліп отырған мәселенің өзектілігіне тоқталып, аудан, қала әкімдіктері штабтың отырысын аудандық деңгейде үйлестіріп, осы бағыттағы жұмыстарды алгортим бағытында атқаруды тапсырды.

– Жыл сайын тұрақты түрде Конго-Қырым геморрагиялық қызбасы ауруының алдын алу мақсатында елді мекендерде кене зиянкесіне қарсы залалсыздандыру шаралары жүргізіліп келеді. Биыл да барлық аудан-қала әкімдіктері залалсыздандыру бағытында тиісті жұмыстарды жүргізуі керек. Медициналық мекемелер де міндеттерін жауапкершілікпен атқаруы тиіс. Тұрғындарға түсіндірме жұмыстарын жүргізіп, аурудың алдын алуға басымдық беріңіздер, – деді Бейсенбай Тәжібаев.

Жиын барысында облыстық санитариялық-эпидемиологиялық бақылау департаментінің басшысы Нұрбек Нышанов облыс бойынша аталлған дерттің эпидемиологиялық жағдайы және атқарылатын жұмыстар туралы баяндаса, Облыстық денсаулық сақтау басқармасының басшысы Асхан Байдуәлиев медициналық ұйымдардың аса қауіпті инфекцияларға, оның ішінде КҚГҚ ауруына дайындығына тоқталды. Өзге де жауапты мекеме басшылары мен өкілдері көкала дертінің алдын алу бағытындағы жұмыстарды баяндады.

Мәжілісте бірқатар ұсыныс-пікірлер айтылып, хаттамаға енгізілді. Өзекті мәселелер ортаға салынып, жауаптыларға тапсырмалар берілді.

Түркістан облысы әкімінің баспасөз қызметі