ТҮРКІСТАН: АУЫЛДАРДАҒЫ МЕДИЦИНА НЫСАНДАРЫНЫҢ ИНФРАҚҰРЫЛЫМЫН ЖАҚСАРТУ ЖАЛҒАСУДА

Түркістан өңірінде шалғай ауылдарды сапалы медициналық қызметпен қамтамасыз ету және инфрақұрылымын жақсарту бағытында ауқымды жұмыстар атқарылып жатыр. Заманауи медициналық пункттер ашылып, қажетті құрал-жабдықтармен толықтырылуда. Бұл бастамалар тұрғындардың дәрігерлік көмекке қолжетімділігін арттырып, денсаулық сақтау жүйесін жаңа деңгейге көтеруге мүмкіндік береді.

Облыс әкімінің орынбасары Бейсенбай Тәжібаев медициналық-санитарлық алғашқы көмек нысандарын пайдалануға тапсыру бойынша мәжіліс өткізді. Денсаулық сақтау және құрылыс басқармаларының жауапты өкілдері, бас дәрігерлер және мердігерлер қатысқан жиында өзекті мәселелер талқыланды.

2024 жылы «Ауылдық денсаулық сақтауды жаңғырту» Ұлттық жобасы аясында 49 медициналық-санитарлық алғашқы көмек нысандарының құрылысын жүргізу жоспарланған. Оның ішінде 32 нысан ашылып, бүгінде жергілікті халыққа қызмет көрсетуде. 1 нысан жеке инвестор тарапынан салынған. Қалған 16 ғимараттың құрылысы аяқталған. Қазіргі таңда құрал-жабдықтарын орнату жұмыстары жүргізілуде. Мәжілісте нысандардың бүгінгі ахуалы баяндалды. Жауапты басқармалардың мәлімдеуінше, 2025 жылы Ұлттық жобадан тыс 20 ФАП-тың құрылысын жүргізу көзделген.

Бейсенбай Дәулетұлы кемшіліктерге тоқталды. Тез арада реттеуді қатаң ескертіп, жұмысты күшейтуді міндеттеді. Ауыл азаматтары медициналық нысандардың игілігін көруге тиіс.

Түркістан облысы әкімінің баспасөз қызметі