ТҮРКІСТАН: ТӨЛЕБИДЕ 100-ДЕН АСҚАН ӘЖЕЛЕРДІ МЕРЕКЕМЕН ҚҰТТЫҚТАДЫ

Халықаралық әйелдер күніне орай, Төлеби ауданының әкімі Еркеғали Әлімқұлов 100 жастан асқан 2 әжені құттықтады. Мереке қарсаңында әжелердің үйіне арнайы барған аудан басшысы ғасыр жасаған қарияларды құттықтап, арнайы сыйлықтар табыс етті.

Бірінші Мамыр ауылдық округі, Алғабас ауылының тұрғыны 101 жастағы Кулатир Жұмабаева, Қоғалы ауылдық округі, Диханкөл ауылының 100 жастағы тұрғыны Айнатай Жақсығұлова бүгінде немере, шөбере, шөпшек сүйіп отырған бақытты жандар. 100 жыл бойы елдің басынан өткен талай нәубетті көрген кейуаналар жиналғандарға ақ батасын берді:

– Біз не көрмедік, айналайындар, соғысты да, аштықты да көрдік. Қазіргідей бейбіт заманда өмір сүріп жатқан біз бақыттымыз. Еліміз аман болсын, – деп, тұтас Қазақ еліне тыныштық, бейбітшілік тіледі.

Зағамбар елді мекенінің тұрғыны «Күміс алқалы» ана Назакат Міркамалова мен Қоғалы ауылдық округі, Ұзынарық ауылының тұрғыны Мадина Бегалиева мерекемен құттықтап келген аудан басшысына ризашылығын жеткізді.

Айта кетсек, бүгінде Төлеби ауданында 100-ден асқан 9 қарт адам бар.

Түркістан облысы әкімінің баспасөз қызметі