ТҮРКІСТАН: ТӨЛЕБИДЕ ЭКОТУРИЗМ ДАМИДЫ

Түркістан облысында экотуризм қарқынды дамып келеді. Облыс әкімі Нұралхан Көшеров туризм саласын дамытуды тапсырған болатын. Осыған орай, Төлеби ауданының әкімі Еркеғали Әлімқұлов Сайрам-Өгем мемлекеттік ұлттық табиғи паркі өкілдерімен кездесіп, әріптестік қарым-қатынас орнату бағытында жұмыс істеу жолдарын қарастырды.

Ұлттық парктың аумағы әртүрлі кіру режимдері бар үш аймаққа бөлінген: қорық режимі (кіру жабық), туристік және рекреациялық. Ұлттық парктің аумағында Сайрам шыңы бар, ол теңіз деңгейінен 4236 м биіктікте орналасқан. Сонымен қатар Қырық қыз жартастары, Мақпал көлі теңіз деңгейінен 2100 м биіктікте орналасқан, Сусіңген биік таулы көлі (теңіз деңгейінен 1700 м) бар және Грейг қызғалдақтары өседі.

Сайрам-Өгем МҰТП аумағында өсімдіктердің 1635 түрі бар. Оның ішінде Қызыл кітапқа енген 62 түрі кездеседі.

Кездесу барысында парк аумағының рекреациялық аймақтарда туризм саласын дамыту жолдары талқыланды. Мекеме басшысы парктың 17 519 гектар жер телімі рекреациялық және туристік қызмет аймағы болып саналатынын, және бұл аумақта келушілерге арнап 11 туристік соқпақ ұйымдастырылғанын айтты. Қазіргі таңда парк аумағындағы жалпы ауданы 343,2 гектарды құрайтын 29 жер телімі туристік және рекреациялық мақсатта пайдалануға берілген.

Сондай-ақ, рекреациялық аймақтарда демалыс нысандарын көбейту, экотуризмді дамыту мақсатында инфрақұрылым жүргізіліп, жол салынуы қажеттігі айтылды. Бұл бағыттағы жұмыстар жалғасын табады.

Түркістан облысы әкімінің баспасөз қызметі