ТҮРКІСТАН ОБЛЫСЫНДА ШЕГІРТКЕ ЗИЯНКЕСІНЕ ҚАРСЫ КҮРЕС ТАЛАПҚА САЙ ЖАЛҒАСЫП ЖАТЫР

Қазақстанда шегіртке тектес зиянкестердің 270-тен аса түрі мекен етеді. Оның ішіндегі ең қауіптісі – Марокко шегірткесі (Dociostaurus maroccanus). Ол ауыл шаруашылығына ең көп зиян келтіретін, аса қауіпті үйірлі шегіртке түрлерінің бірі. Бұл жәндіктер 1 шаршы метрге 200-300-ге дейін бірігіп әрекет етеді. Мерзімінде анықтап тиісті шараларды атқармаған жағдайда өсіп тұрған дәнді дақылдарды, жайылымдарды, жоңышқаны және басқа да ауыл шаруашылығы дақылдарын талғамай жеп, шаруаларды шығынға батырады.

Түркістан облысында зиянкеске қарсы күрес жұмысын үйлестіру үшін 2 штаб құрылған. Олардың бірі Арыс қаласында, екіншісі Келес ауданында орналасқан. Штаб облыс әкімінің орынбасары Нұрбол Тұрашбековтің басшылығымен жұмыс атқарады. Мақсаты – Болжам орталығы ұсынған аймақтарда химиялық өңдеудің талапқа сай атқарылуын қамтамасыз ету.

Штаб тарапынан 65 сектордағы жағдай күнделікті зерделенеді. Химиялық препараттың уақтылы қажетті мөлшерде жеткізіліп, мақсатты жұмсалуы қадағаланады. Дәріленген аймақтарды мобильді топтар тексеріп, нәтижесін штаб төрағасына баяндайды.

Түркістан облысы бойынша шегіртке зиянкесіне қарсы 906,088 мың га аумақты зерттеу жоспарланған. Қазіргі таңда 847,5 мың га аумақ зерттелді. Оның 288,7 мың гектарында зиянкес экономикалық зиянды шегінен (ЭЗШ) асқан.

Облыстағы 10 ауданда жалпы 287,8 мың гектар дәріленді. Өңдеу жұмыстарына 13-мамыр күні 168 арнайы техника, 27 су тасығыш көлік, мыңға жуық анықтаушы жұмылдырылған.

Штабтың жүргізген мониторинг қорытындысымен химиялық өңдеу аяқталған секторлардың техникасы өзге қауіпті аймақтарға жолданды.

58 техника – Келес ауданында, 41 техника – Сарыағаш ауданында, 31 техника Арыс қаласының аумағында жұмыс атқарып жатыр.

Түркістан облысы әкімінің баспасөз қызметі