ТҮРКІСТАНДА АВТОКӨЛІК КОМПРЕССОРЛЫҚ ГАЗ ҚҰЮ СТАНЦИЯСЫ БАР ЗАМАНАУИ СЕРВИСТІК ОРТАЛЫҚ ІСКЕ ҚОСЫЛДЫ

Түркістан қаласында халықаралық көлік дәлізі бойында автокөлік компрессорлық газ құю станциясы (АГТКС) бар жол бойындағы заманауи сервистік орталық іске қосылды. Нысанның салтанатты ашылу салтанатына Түркістан облысы әкімінің бірінші орынбасары Зұлпыхар Жолдасов, Түркістан қаласының әкімі Әзімбек Пазылбекұлы, «Өнеркәсіпті дамыту қоры» АҚ басқарма төрағасының орынбасары Азат Абайдилдин, сондай-ақ жобаны жүзеге асырған «Компрессорные технологии-3» ЖШС құрылтайшысы Болат Бушанов және сала өкілдері қатысты.

Облыс әкімінің бірінші орынбасары бұл жобаның өңір үшін маңыздылығына тоқталып, Түркістан облысының әкімдігі инвесторларға жан-жақты қолдау көрсетіп келе жатқанын атап өтті. Мұндай инфрақұрылымдық жобалар өңірдің көлік-логистикалық әлеуетін арттырып қана қоймай, экологиялық таза отынды дамытуға және халықаралық транзиттік бағыттар бойындағы сервистік қызмет сапасын жақсартуға мүмкіндік беретінін жеткізді.

Жобаны «Компрессорные технологии-3» ЖШС жүзеге асырды. Компанияның құрылтайшысы – «Алаш Метан» ЖШС. Жобаның негізгі мақсаты – автомобильдік газ толтыру компрессорлық станциялары бар жол бойы сервистік пункттер желісін құру арқылы нарықта экологияға зиянсыз сығылған табиғи газды дамыту.

Аталған кешен халықаралық маңызы бар «Батыс Қытай – Батыс Еуропа» автокөлік дәлізі бойында орналасқан. Бұл дәліз Қазақстан аумағындағы негізгі транзиттік бағыттардың бірі болып саналады және Түркістан, Қызылорда, Ақтөбе, Орал секілді ірі қалаларды байланыстырады. Енді ірі автобустар мен жүк көліктері осы орталықтан жанармай ала алады.

Сығылған табиғи газды пайдалану дәстүрлі бензин мен дизель отынына қарағанда айтарлықтай үнемді әрі тиімді. Сонымен қатар ол атмосфераға таралатын зиянды заттардың мөлшерін азайтады.

Станцияның жобалық қуаты сағатына 2000-2400 текше метрді құрайды деп жоспарланған. Бұл тәулігіне шамамен 250 автокөлік құралын газбен толтыруға мүмкіндік береді. Жол бойында көлік жүргізушілеріне сапалы әрі қолжетімді қызмет көрсетуге жағдай жасалады.

Түркістандағы жаңа автогаз құю станциясы өңірдің көлік инфрақұрылымын дамытуға, халықаралық транзиттік әлеуетін арттыруға, жаңа жұмыс орындарын ашуға, инвестициялық белсенділікті арттыруға және жол бойындағы қызмет көрсету сапасын жақсартуға мүмкіндік береді.

Түркістан облысы әкімінің баспасөз қызметі