ЦИФРЛАНДЫРУ ЖӘНЕ ЖАСАНДЫ ИНТЕЛЛЕКТ: ТҮРКІСТАНДА ҚАРЖЫЛЫҚ ҚАУІПСІЗДІК МӘСЕЛЕСІ ТАЛҚЫЛАНДЫ

Түркістанда «Қаржылық қауіпсіздік: цифрландыру және жасанды интеллект дәуірінде» форумы аясында панельдік және пленарлық отырыстар өтті. Ауқымды іс-шараға облыс әкімі Нұралхан Көшеров қатысып, қаржылық қауіпсіздікті қамтамасыз етуде цифрлық технологиялар мен жасанды интеллекттің маңызына тоқталды. Өңір басшысы өз сөзінде жаһандық цифрлық трансформация жағдайында экономикалық тұрақтылық пен қаржылық қауіпсіздікті сақтау – мемлекеттік саясаттың басым бағыты екенін атап өтіп, жас ІТ мамандарына сәттілік тіледі.

– Сіздерді киелі Түркістан төрінде көріп отырғаныма қуаныштымын. Бүгінгі «Қаржылық қауіпсіздік: цифрландыру және жасанды интеллект дәуірінде» форумына қош келдіңіздер! Мемлекет басшысы Қасым-Жомарт Кемелұлы Тоқаев биыл Қаржылық мониторинг агенттігінде өткен жиында «Цифрлық технология мен жасанды интеллект дәуірінде жұмысқа түбегейлі жаңа көзқараспен қарау міндеті тұр» деді. Экономиканың барлық салаларын цифрландыру – мемлекеттік басқару сапасын арттыруға, процестердің ашықтығын қамтамасыз етуге және бюджет қаражатын тиімді жұмсауға толық мүмкіндік беретін маңызды қадам. Өздеріңіз білетіндей, биылғы 15 наурызда маңызды саяси оқиға – жалпыхалықтық референдум өтеді. Жаңадан әзірленген Ата заңымыздың жобасында алғаш рет цифрландыру мәселелері мен азаматтардың цифрлық құқықтарын қорғауға ерекше басымдық берілген. Конституциямызға «цифрлық егемендік» және «жеке деректерді қорғаудың жаңа кепілдіктері» туралы нормалардың енгізілуі – заман талабы. Сондықтан бүгінгі форум осы тарихи реформалардың іс жүзіндегі көрінісі. Біз жасанды интеллект экономика мен күнделікті өмірдің ажырамас бөлігіне айналған жаңа дәуірге қадам бастық. Цифрландыру қаржылық қызметтерді қолжетімді әрі ыңғайлы еткенімен, жасанды интеллектіні белсенді қолдану арқылы киберқылмыстың жаңа түрлері пайда болуда. Жасанды интеллектінің мүмкіндігін толығымен пайдалану арқылы мемлекет қаржысын жымқыруды болдырмауды және бюджет қаржысын үнемдеуді қамтамасыз етуіміз қажет. Форум аясында өтіп жатқан IT-стартаптар байқауына қатысушыларға ерекше тоқталғым келеді. Сіздер алдағы уақытта IT саласында жаңалықтар ашып, елімізді дамытуға үлес қосады деп сенемін. Осы алаңда туындаған жаңа идеялар мен шешімдер отандық цифрлық қауіпсіздік стратегиясына өз үлесін қоса берсін, – деді Нұралхан Көшеров.

Пленарлық отырыста Қазақстан Республикасы Қаржылық мониторинг агенттігінің ресми өкілі Ернар Тайжан модераторлық етті. Түркістан облысының прокуроры Мұрат Тлеубердиев қаржылық құқықбұзушылықтардың алдын алу, заңдылықты сақтау және ведомствоаралық өзара іс-қимылды күшейту мәселелерін қозғады. Ұлттық қауіпсіздік комитетінің Түркістан облысы бойынша департаментінің бастығы Болат Қалмұрзаев, Түркістан облысы бойынша Экономикалық тергеп-тексеру департаментінің басшысы Ерболат Балғабаев та көтеріліп отырған мәселелердің маңызына тоқталды. Облыстық полиция департаментінің бастығы Арыстанғани Заппаров цифрлық қылмыстармен күрес тетіктері мен киберқауіпсіздікті арттыру шаралары жөнінде баяндады.

Қазақстан-Британ техникалық университетінің ректоры Маратбек Ғабдуллин білім беру мен заманауи технологияларды ықпалдастырудың маңызын атап өтіп, жоғары оқу орындарының қаржылық қауіпсіздік саласына мамандар даярлаудағы рөлін айтты. ҚР Қаржылық мониторинг агенттігінің Цифрландыру департаментінің басшысы Мұрат Джакин агенттік тарапынан жүзеге асырылып жатқан цифрлық жобалар мен деректерді талдау жүйелері туралы баяндады.

Blockchain технологияларын дамыту мәселесі де назардан тыс қалмады.

Сонымен бірге цифрлық трансформация, жасанды интеллектіні қаржылық мониторинг және құқық қорғау жүйелеріне енгізу, деректерді тиімді пайдалану, сондай-ақ киберқылмыстың алдын алу мәселелері жан-жақты талқыланды. Іс-шара мемлекеттік органдар, сарапшылар және ІТ-сала өкілдері арасындағы ашық диалог алаңына айналып, қаржылық қауіпсіздікті нығайту жолындағы өзекті бастамаларды пысықтауға мүмкіндік берді.

Түркістан облысы әкімінің баспасөз қызметі