НҰРАЛХАН КӨШЕРОВ ИНВЕСТОРЛАРМЕН ЖАҢА ЗАУЫТТАРДЫҢ ЖҮЗЕГЕ АСУ БАРЫСЫН ПЫСЫҚТАДЫ

Түркістан облысында индустриялық-инновациялық даму бағытына айрықша басымдық берілуде. Өңірде заманауи өндіріс орындарын ашу, шикізатты терең өңдеу және жаңа жұмыс орындарын құруға бағытталған ауқымды жобалар кезең-кезеңімен жүзеге асырылып жатыр. Облыс әкімі Нұралхан Көшеровтің төрағалығымен өткен кезекті Инвестициялық штаб отырысында жаңа зауыттардың іске асырылу барысы жан-жақты талқыланды.

Жиынға облыс әкімінің орынбасарлары, басқарма басшылары, аудан және қала әкімдері, сондай-ақ отандық және шетелдік инвесторлар мен бизнес өкілдері қатысты. Күн тәртібінде инвестиция тарту, инвестициялық ахуалды жақсарту және бастамашы жобаларды уақтылы әрі сапалы іске асыру мәселелері қаралды.

Облыс әкімі әр инвестормен жеке тілдесіп, жобалардың қазіргі жағдайын және туындаған өзекті мәселелерін тыңдады. Инфрақұрылым тарту, жер телімдерін рәсімдеу, инженерлік желілерге қосылу, логистика және мемлекеттік қолдау тетіктері бойынша нақты тапсырмалар берілді.

– Әр инвестормен жеке жұмыс істеу – ашықтық пен жауапкершіліктің көрінісі. Бұл – барлық деңгейдегі әкімдерге қойылатын басты талап. Инвестициялық жобалардың уақтылы әрі сапалы іске асуы қатаң бақылауда болады. Біздің басты мақсатымыз – Түркістан облысында инвестициялық ахуалды жақсарту. Әрбір жоба – жаңа жұмыс орны, жаңа мүмкіндік. Әрбір инвестициялық жобаның табысты іске асуы үшін барлық қажетті қолдауды көрсетуіміз керек. Ашықтық – басты қағидатымыз. Мемлекет басшысы Қасым-Жомарт Тоқаев ел дамуының негізгі басымдықтарын айқындап, нақты әрі жоғары жауапкершілік жүктеді. Облыста осы бағыттағы жұмысты жүйелі түрде ұйымдастырып, арнайы экономикалық аймақтарды экономикалық өсім мен инвестиция тартудың нақты драйверіне айналдыруға күш саламыз, – деді Нұралхан Көшеров.

Нұралхан Көшеров Мемлекет басшысы Қасым-Жомарт Тоқаевтың инвестиция тарту, арнайы экономикалық аймақтардың әлеуетін толық пайдалану, шешім қабылдауда жеделдік пен батылдықты арттыру жөніндегі тапсырмаларын атап өтті. Президент тапсырмасына сәйкес арнайы экономикалық аймақтарды экономикалық өсім мен инвестиция тартудың нақты драйверіне айналдыру бағытындағы жұмыстар жүйелі түрде жалғасады.

Инвестициялық штаб отырысында биыл жүзеге асырылатын бірқатар маңызды жобалардың барысы қаралды. Атап айтқанда, Сауран ауданында арматура өндіру жобасы іске асырылуда. Бұл құрылыс саласына қажетті өнімді өңірдің өзінде өндіруге мүмкіндік береді. Сонымен қатар тағам қалдықтарын ұсақтағыштарды өндіруді локализациялау жобасы жүзеге асуда. Әкім жобаның өндірістік қуатын кеңейту бойынша кеңес беріп, мемлекеттік қолдау шаралары қарастырылатынын жеткізді.

Созақ ауданында жаңа өнеркәсіптік алаңның құрылысы жүргізілуде. Сонымен бірге «Инкай» кен орнында аффинаж зауытының құрылысы қолға алынған. Кәсіпорын өкілдері жобалардың технологиялық ерекшеліктері мен өндірістік көрсеткіштері туралы баяндады. Ордабасы ауданында автоклавты газдалған бетон блоктары мен қабырғалық панельдер шығаратын зауыт салынуда. Бұл жоба құрылыс индустриясының дамуына серпін береді.

Арыс қаласында «MEGA-AGAT AGRO» ЖШС өсімдік майын өндіретін зауыттың құрылысы жүргізілуде. Өнім ішкі нарықты қамтамасыз етіп қана қоймай, экспортқа бағытталады. Мақтаарал ауданында профлисттер, құбырлар, сэндвич-панельдер және жеңіл болаттан жасалған құрылымдар (ЛСТК) өндіретін металл өңдеу зауыты салынуда. Бұл – импортты алмастыруға бағытталған маңызды жоба.

Сарыағаш ауданында кірпіш шығаратын цехтың құрылысы жалғасуда. Жетісай ауданында пластик жәшіктер өндіру жобасы іске асуда. Сонымен қатар түрік инвесторлары көкөніс сақтау қоймасы мен жылыжай кешенін салуда. Бұл жоба агроөнеркәсіп кешенін дамытуға, өнімді жыл бойы сақтау мен экспорттық әлеуетті арттыруға мүмкіндік береді.

Жиын барысында инвесторлардың ұсыныстары тыңдалып, мемлекеттік органдар тарапынан жедел шешім қабылдау тетіктері нақтыланды. Берілген тапсырмалар хаттамаға енгізіліп, орындалуы тұрақты бақылауға алынды.

Түркістан облысында жүзеге асырылып жатқан бұл бастамалар – тек өндіріс орындарын ашу емес, экономиканы әртараптандыру, терең өңдеуді дамыту, жаңа жұмыс орындарын құру және өңірдің инвестициялық тартымдылығын арттыру бағытындағы нақты қадамдар. Индустрия, құрылыс материалдары өндірісі, металл өңдеу, агроөнеркәсіп және тамақ өнеркәсібі салаларындағы жаңа жобалар Түркістан облысын еліміздің жетекші өндірістік орталықтарының біріне айналдыруға негіз болмақ.

Түркістан облысы әкімінің баспасөз қызметі