ТҮРКІСТАНДА КАНОЭДЕН ЖӘНЕ ПАРАКАНОЭДЕН АЗИЯ ЧЕМПИОНАТЫН ӨТКІЗУГЕ ДАЙЫНДЫҚ ТАЛҚЫЛАНДЫ

Түркістан облысы әкімінің орынбасары Ертай Алтаев Азия байдаркада және каноэде есу конфедерациясының президенті Прашант Кушваха, Азиалық каноэ конфедерациясындағы байдарка және каноэде есу (Canoe Sprint) комитетінің төрағасы Ченг Кок Хуа, Үндістанның байдарка және каноэда есу қауымдастығының төрайымы Балкиз Мирмен кездесті. Кездесуде каноэден және параканоэден Азия чемпионатын өткізу, спорт саласын дамыту және ынтымақтастықты нығайту мәселелері талқыланды.

Облыс әкімінің орынбасары облыста спортты дамыту бағытында ауқымды жұмыстар атқарылып жатқанын айтып, заманауи ескек есу каналында халықаралық деңгейдегі жарыстарды ұйымдастырудың маңыздылығын атап өтті.

– Біз үшін Байдаркада мен каноэде есуден Азия конфедерациясы арасындағы байланыстың нығая түсуі ерекше маңызға ие. Түркістан қаласында халықаралық стандарттарға сай ескек есу каналының іске қосылуы осыған мүмкіндік береді. Ескек есу арнасы – еліміздегі теңдесі жоқ заманауи спорттық нысан. Каналда республикалық, азиялық және әлемдік деңгейдегі жарыстарды өткізуге толық мүмкіндік жасалған. Қазіргі таңда мұнда 6 спорт түрі дамытылады: академиялық есу, байдарка мен каноэда есу, параканоэ, ашық суда жүзу және триатлон. Аталған спорт түрлері бойынша облыс көлемінде 50 жаттықтырушы, 350 спортшымен жұмыс істейді. Бүгінгі таңда Түркістан облысының спортшылары ескек есу спорт түрлері бойынша Қазақстан Республикасының ұлттық құрамасының басым бөлігін құрайды. Келесі жылы Түркістан қаласында жасөспірімдер мен жастар арасындағы байдарка мен каноэде есуден және ерсектер арасында параканоэден Азия чемпионатын маусым айында өткізу туралы тарихи шешім қабылданды, – деген Ертай Кенжебекұлы халықаралық спорттық іс-шараны өткізу жауапкершілігін сеніп тапсырғандары үшін алғысын білдірді.

Азия байдаркада және каноэде есу конфедерациясының президенті Прашант Кушваха түркістандықтардың қонақжайлығына алғысын білдіріп, өңірде халықаралық деңгейдегі жұмыстар атқарылып жатқанын ерекше атап өтті.

– Түркістанда әлемдік стандарттарға сай ескек есу каналын салу – үлкен жетістік. Бұл спортты жаңа деңгейге көтеруге жол ашады. Азия чемпионатын өткізу үшін бар күш-жігерімізді саламыз. Сонымен қатар оқу-жаттығу жиындарын өткізуге де дайынбыз. Спортшылар мен жаттықтырушылардың кәсіби деңгейін көтеру бағытында қолдау көрсетуге ниеттіміз, – деді ол.

Кездесу барысында облыс әкімінің орынбасары ересектер арасында Әлем чемпионатын және басқа да халықаралық жарыстар өткізу, жаттықтырушылар мен төрешілерге оқу семинарларын тұрақты ұйымдастыру және ынтымақтастық аясында тәжірибе алмасу және спорттық шеберлікті арттыру мақсатында бірлескен оқу-жаттығу жиындарын өткізу туралы ұсыныстарын жеткізді. Бұл бастамаға қолдау танытқан конфедерация басшысы Түркістанның әлеуеті жоғары екенін жеткізіп, Түркістанда ескек есу каналын дамытуға қолдау көрсететінін айтты.

Кездесу соңында тараптар өзара ынтымақтастықты одан әрі нығайтуға, Түркістандағы ескек есу арнасын дамыту бойынша бірлескен жұмыстарды жалғастыруға және халықаралық жарыстар өткізуге уағдаласты.

Түркістан облысы әкімінің баспасөз қызметі