ТҮРКІСТАН: СПОРТ КЕШЕНДЕРІ БАР «ЕСКЕК ЕСУ» АРНАСЫ СПОРТ, ТУРИЗМ ЖӘНЕ ИРРИГАЦИЯ САЛАЛАРЫН БІРІКТІРЕДІ

Түркістан қаласында халықаралық талаптарға сай салынған бірегей спорт нысаны — «Ескек есу» арнасы жақында пайдалануға беріледі. Орта Азияда теңдесі жоқ бұл спорт кешені бірнеше бағытта қызмет атқарады.

Жалпы аумағы 100 гектарды құрайтын арнаның ұзындығы — 2222 метр, ені — 260 метр, тереңдігі — 4 метр.

Жалпы көлемі 2,0 млн м³ болатын арнаға су Кенсай-Көксай-2 су қоймасынан, Шаға көлінен және Түркістан магистралды каналынан жеткізіледі.

Нысанда 2,4 шақырымдық су жеткізу арнасы, 1,8 шақырымдық су шығару арнасы және 3 технологиялық көпір қарастырылған.

Сонымен қатар, 940 метрлік жағажай мен 100 орындық трибуна, қонақүй, жаттығу базасы, әкімшілік ғимарат, демалыс орындары бар.

Нысан ICF (Халықаралық байдарка және каноэ федерациясы) және FISA (Халықаралық академиялық есу федерациясы) стандарттарына толық сай келеді.

Бірегей нысан қатарынан бірқатар функция атқарады:

Бұл кешенде академиялық ескек есу, байдарка мен каноэ спорт түрлерінен халықаралық спорттық іс-шаралар, Әлем және Азия кубогы деңгейіндегі жарыстарды өткізуге мүмкіндік қарастырылған.

Мұнда спортшылар тұрақты түрде жаттыға алады.

Сонымен қатар нысан демалыс, серуен, түрлі көпшілік шаралар өткізуге пайдаланылмақ.

Одан бөлек, арнадағы су Түркістан қаласының Әкімшілік-іскерлік орталығындағы және «Ескек есу» арнасы аумағындағы ирригациялық жүйені сумен қамтамасыз етуге, жасыл белдеуді суаруға пайдаланылады.

Бұл жоба Түркістан қаласын спорттық, экологиялық және туристік тұрғыдан дамытуға зор үлес қосады. Қазақстанда академиялық ескек есу спортын жан-жақты дамытуға жағдай жасайды.

Түркістан облысы әкімінің баспасөз қызметі