ТҮРКІСТАН ОБЛЫСЫ ӘКІМІНІҢ ОРЫНБАСАРЫ ТҰРҒЫНДАРДЫҢ ӨТІНІШТЕРІН ТЫҢДАДЫ

Түркістан облысының «Ашық әкімдік» кеңсесінде кезекті жеке қабылдау өтті. Бұл жолы облыс әкімінің орынбасары Бейсенбай Тәжібаев өңір тұрғындарының арыз-өтініштерін тыңдады. Қабылдауға жазылған 10 азамат маңызды мәселелерін ортаға салып, өздерін алаңдатқан мәселеге шағымданды.

Қабылдауға Жетісай, Созақ, Сауран, Қазығұрт, Төлеби, Бәйдібек аудандары мен Түркістан қаласының тұрғындары арнайы келді. Шағымдар мен ұсыныстардың басым бөлігі білім, денсаулық, жұмыспен қамту салаларына қатысты болды. Атап айтқанда, медициналық пункт салу, жұмысқа орналасу, жаңа білім нысанын салу, әлеуметтік қолдау көрсету секелді мәселелер көтерілді. Мәселен, түркістандық тұрғын ауған соғысы ардагерлеріне бір реттік көрсетілетін көмекті ұлғайтуды және жұмыспен қамтуға ықпал етуді сұрады. Сауран ауданынан келген азамат 2-топ мүгедектігінен 3-топ мүгедектігіне шығарғанына шағымданса, енді тағы бір тұрғын атаулы әлеуметтік көмек (АСП) пен мемлекеттік грант берілмегенін жеткізді.

Жеке қабылдауға тиісті басқарма өкілдері де қатысып, қордаланған мәселелердің жүйелі шешімін табуға атсалысты. Облыс әкімінің орынбасары облыс тұрғындарының өтініштерін мұқият тыңдап, заңды шешілу жолдарын түсіндірді. Сонымен қатар тиісті сала мамандарына тұрғындардың өтініштерін қайта сараптап, жауап жолдауды тапсырды.

Түркістан облысы әкімінің баспасөз қызметі