ТҮРКІСТАН ТӨРІНДЕ ҚАЗАҚСТАН РЕСПУБЛИКАСЫНЫҢ АТА ЗАҢЫ АРДАҚТАЛДЫ

Түркістан қаласындағы «Конгресс холл» көпсалалы кешенінде Қазақстан Республикасы Конституциясының 30 жылдығына арналған «Ата заңым – Айбыным» атты салтанатты іс-шара өтті.

Мерекелік жиын шымылдығы «Ата Заң айшықтары» театрландырылған қойылымымен түрілді. «Түркістан» балалар хоры жиынға қатысушылармен бірге Қазақстан Республикасының Мемлекеттік Гимнін орындады.

Салтанатты шарада алғысөз алған Түркістан облысының әкімі Нұралхан Көшеров көпшілікті мерекемен құттықтап, елдің әлеуметті-экономикалық дамуына елеулі үлес қосып келе жатқан еңбек адамдарын марапаттады.

– Баршаңызды еліміздің маңызды мерекесі – Конституция күнімен шын жүректен құттықтаймын! 30 жыл ішінде осы құжат тәуелсіз мемлекетіміздің саяси тұрақтылығы мен экономикалық дамуының басты кепіліне айналды. Қазақстан бейбітшілік пен келісімнің үлгісіне айналып, халықаралық аренада беделі артты. Мемлекет басшысы Қасым-Жомарт Кемелұлы Тоқаевтың бастамасымен «Әділетті Қазақстан» бағытында жүйелі реформалар жүргізілуде. Еліміздің тұрақты дамуының, бейбіт өмірдің, қоғамдық келісім мен ішкі бірліктің басты шарты – «Заң және тәртіп». Құқық қорғау органдары мен жергілікті билік органдарының өзара бірлескен іс-қимылының арқасында қоғамдық тәртіп нығайып, қылмыс деңгейі азайып келеді. Сонымен қатар, береке мен бірлігі жарасқан Түркістан өңірінің әлеуметтік-экономикалық дамуы да қарқынды жүруде. Нәтижесінде қысқа мерзімді экономикалық өсім 117,7%-ды құрады. Бұл көрсеткіш бойынша республикада көшбасшылар қатарындамыз. Өнеркәсіп өнім көлемі осы жылдың 7 айында 852 млрд.теңгеге жетіп, өткен жылдың тиісті кезеңімен салыстырғанда 12,3%-ға артты. Түркістан — тек еліміздің рухани астанасы ғана емес, сонымен қатар геосаяси, әлеуметтік-экономикалық тұрғыдан аса маңызды өңір. Осыған орай, Түркістанға Мемлекет басшысының тапсырмасымен ерекше мәртебе беру туралы арнайы заң қабылданды. Қасиетті қаламызда түрлі нысандар бой көтеріп, шын мәніндегі жаңа сәулетті шаhарға айналды. Бұл жетістіктеріміз Ата Заңымыздың негізінде жүзеге асып отыр. Конституцияның 30 жылдығы – тек мереке ғана емес, өткенге баға беріп, болашаққа бағдар жасайтын тарихи белес. Алдағы уақытта біз Ата Заңымызды берік ұстанып, елімізді өркендету жолында аянбай еңбек ете береміз. Тәуелсіздігіміз – тұғырлы, елдігіміз – ғұмырлы болсын! – деді Нұралхан Оралбайұлы.

Қазақстан Республикасының егемендігінің нығаюы мен әлеуметтік-экономикалық дамуына қосқан елеулі үлесі үшін бірқатар азаматқа «Қазақстан Республикасының Конституциясына 30 жыл» мерекелік медалі, Қазақстан Республикасының Президентінің Алғыс хаты, облыс әкімінің Грамотасы мен Алғыс хаты табысталды. Олардың қатарында электрші, темір ұстасы, электротехник, өрт сөндіру автокөліктерінің жүргізуші қызметкері, ағаш ұстасы, әлеуметтік әдіскер, мұғалім, дәрігер, аға оқытушы, аға инспектор сияқты еңбек адамдары бар.

Марапаттау рәсімі концерттік бағдарламаға ұласты. Сахнада елімізге танымал «Меломен» тобы, Жұбаныш Жексенұлы, «Voice of Тuran- 2025» халықаралық қазақ әндері фестивалінің лауреаты Альфия Нигматулина, «Таңба» тобы, Түркістан музыкалық драма театрының балет ұжымы және басқа да өнерпаздар өнер көрсетіп, көпшілікке көтеріңкі көңіл күй сыйлады.

Айта кетейік, Түркістан облысында барлық салада алға жылжу бар. Өңір экономикасының негізгі саласы саналатын ауыл шаруашылығында өнім көлемі 346 млрд.теңгені құрап, нақты көлем индексі 103,9% деңгейінде қалыптасты. Негізгі капиталға салынған инвестициялар 695 млрд.теңге құрап, 33,8%-ға өсті. Оның ішінде, 72%-дан астамын жеке инвестиция құрайды. Одан бөлек, өңірде 2025-2028 жылдар аралығында жүзеге асырылатын жалпы құны 2,5 трлн. теңгеге 111 инвестициялық жобаның пулы қалыптастырылған. Бұл жобалар арқылы 23 766 жұмыс орны құрылады. Биыл жалпы құны 335 млрд. теңгені құрайтын 57 инвестициялық жобаны жүзеге асырып, 8 163 жұмыс орнын құру жоспарлануда. Бүгінгі таңда 124 млрд. теңгеге 21 инвестициялық жоба іске асырылып, 3 457 жұмыс орны құрылды. Іске асқан жобалардың ішінде терең өңдеу өнеркәсібі бағытындағы ірі инвестициялық жобалар бар. Атап айтқанда, Ордабасы ауданындағы «Central Asia Aluminium» ЖШС-ның алюминий бұйымдарын өндіру зауыты, Ордабасы ауданындағы «Altyn Land» ЖШС-ның автоматтандырылған кірпіш зауыты, Созақ ауданындағы «Қазақстандық-Француздық «КАТКО» БК ЖШС-ның табиғи уранды өңдеу кешені. Инвестициялық жобаларды жүзеге асыру бағытындағы жұмыстар жалғады.

Түркістан облысы әкімінің баспасөз қызметі