ТҮРКІСТАН: ӘР АЗАМАТТЫҢ ҮНІ ЕСКЕРУСІЗ ҚАЛМАЙДЫ

Түркістан облысы әкімінің орынбасары Бейсенбай Тәжібаев «AMANAT» партиясының Түркістан облыстық филиалы ғимаратында азаматтарды жеке мәселелері бойынша қабылдап, тұрғындардың өтініштерін мұқият тыңдады. Қоғамдық қабылдауға партия филиалы атқарушы хатшысының орынбасары Қалыйма Жантөреева да қатысты. Бұл – «AMANAT» партиясы қолға алған ашықтық пен халықпен кері байланыс орнату бағытындағы жүйелі жұмыстың бір көрінісі. Қоғамдық қабылдаулар халық пен билік арасындағы байланысты нығайтып, нақты мәселелердің шешілуіне жол ашады.

Қабылдауға келген тұрғындардың басым бөлігі білім саласындағы мәселелерді көтерді. Атап айтқанда, азаматтар мектептерге жұмысқа орналасудағы кедергілер, жұмыссыздық, білім саласындағы заңсыздықтар мен әділетсіздіктер, заңсыз жұмыстан шығару жағдайлары бойынша шағым түсірді. Тұрғындар білім саласындағы кадрлық саясаттың ашықтығына, әділдігіне сенім артып, өздерінің білімі мен біліктілігіне сай лайықты жұмысқа орналасуға қолдау көрсетуді сұрады. Қоғамдық қабылдауда сондай-ақ, медицина қызметкерлерінің немқұрайлығы, тегін дәрі-дәрмекке қолжетімділіктің төмендігі, тұрғын-үй кезегі жылжуының баяулығы, әлеуметтік жағдайының төмендігінен көмек сұраған азаматтардың мәселелері де көтерілді.

Облыс әкімінің орынбасары Бейсенбай Дәулетұлы әрбір тұрғынның мәселесін мұқият тыңдап, заң аясында түсініктеме берді. Ол айтылған өтініштердің ешқайсысы назардан тыс қалмайтынын, әр мәселе бойынша тиісті басқармалар мен бөлімдерге нақты тапсырмалар берілетінін, бақылауға алынатынын атап өтті.

Қабылдау барысында партия филиалы атқарушы хатшысының орынбасары Қалыйма Жантөреева бүгінгі қабылдауда көтерілген мәселелер қоғамдағы өзекті түйткілдердің айқын көрінісі екенін, партия филиалы тарапынан да барлық шағымдар мен ұсыныстар тиісті органдарға жолданып, бақылауға алынатынын жеткізді.

Түркістан облысы әкімінің баспасөз қызметі