Отбасы, құқықтық тәрбие және бейбіт жиналыстар институты: 2024 жылы Омбудсменнен қандай бастамалар күтуге болады?

 

 

Қазақстан Республикасындағы Адам құқықтары жөніндегі уәкіл кеңсесі құқықтық білім беруге және адам құқықтары саласындағы өзекті мәселелерді талқылауға бағытталған 120-ға жуық іс-шараны қамтитын 2024 жылға арналған қызмет жоспарын ұсынды.

Құжатта қоғамды құқықтар мен бостандықтарды құрметтеу бағытында тәрбиелеу, тұрмыстық зорлық-зомбылық саласындағы бастамаларды ілгерілету, ұлттық алдын алу тетігі, мүмкіндігі шектеулі жандардың құқықтарын қорғау және т.б. мәселелерге ерекше назар аударылатын болады.

Сонымен қатар, биыл Адам құқықтары жөніндегі уәкіл кеңсесінің жұмысы халықаралық ынтымақтастықты нығайтуға бағытталады – аймақтық әйелдер қауіпсіздігін қамтамасыз ету үшін халықаралық форум өтеді деп жоспарлануда.

Сондай-ақ жыл басында АҚЖУ тұрмыстық зорлық-зомбылық саласындағы заңнаманы қатайту, сексуалдық зорлық-зомбылық үшін жауапкершілікті белгілеу және еңбек әлеміндегі кемсітушілікпен күресу бойынша ұсыныстар жариялайды.

«Халықаралық отбасы күнінің 30 жылдығына біз адам құқықтары призмасы арқылы Қазақстандағы отбасы институтының дамуын кешенді зерттеуді аяқтауды жоспарлап отырмыз. Онда тұрмыстық зорлық-зомбылықпен күрес мәселелері бөлек қарастырылады. Бүгінде әйелдердің, балалардың және тұрмыстық зорлық-зомбылық құрбандарының құқықтарын одан әрі ілгерілету бойынша ұсыныстар пакеті әзірленді, оны Арнайы баяндамада жүйелеуге болады», - деп атап өтті Қазақстан Республикасындағы Адам құқықтары жөніндегі уәкіл Артур Ластаев.

Бұл ұсынымдар, ең алдымен, отбасылық және тұрмыстық саладағы қылмыстардың жан-жақты профилактикасына, тұрмыстық зорлық-зомбылық үшін барабар жауапкершілікке, оңалту және қайта әлеуметтендіру мәселелеріне, отбасылық, экономикалық және саяси институттардағы гендерлік алшақтықтарды жоюға қатысты.

Сонымен қатар, Уәкіл мекемесі бала құқықтары жөніндегі өңірлік өкілдердің мәртебесін бекіту, бейбіт жиындарды өткізу бойынша ведомствоаралық ынтымақтастықты жақсарту, кемсітушілікке қарсы заңнаманы жетілдіру және басқа да көптеген проблемалар негізінде ұсыныстар енгізуді көздеп отыр.

Уәкіл кеңсесі халықаралық және өңірлік ұйымдармен, сондай-ақ шет мемлекеттердің ұлттық құқық қорғау институттарымен ынтымақтастығын жалғастыра беретінін атап өтеміз. Бұл бағыт адам құқықтарын жаһандық деңгейде қорғау мен ілгерілетуге ықпал етеді және Адам құқықтары жөніндегі уәкіл институтының адам құқықтары саласындағы халықаралық стандарттарға адалдығын растайды.