Омбудсмен әл-Фараби атындағы ҚазҰУ халықаралық қатынастар факультетінің 30 жылдығымен құттықтады

Адам құқықтары жөніндегі уәкіл Артур Ластаев әл-Фараби атындағы Қазақ ұлттық университетінің халықаралық қатынастар факультетінің құрылуына 30 жыл толуына арналған мерекелік шараға қатысты.

Іс-шараның қонақтары ретінде факультет түлектері, сондай-ақ Алматы қаласында қызмет атқаратын өзге елдердің бас консулдары, консулдары мен вице-консулдары қатысты.

Омбудсмен факультет оқытушыларын, түлектерін және студенттерін мерейтойымен құттықтады.

Өз сөзінде Артур Ластаев бүгінгі таңда халықаралық қатынастар факультеті жаңа идеялар туып, көшбасшылар қалыптасатын және кәсіби қауымдастықтар құрылатын маңызды орталықтардың бірі екенін атап өтті.

Ұлттық құқық қорғау орталығы өз қызметінде жастармен жұмыс істеуге айрықша назар аударады. Омбудсмен институты жастардың жаңа мүмкіндіктерге қол жеткізуіне және олардың әлеуетінің толық ашылуына жағдай жасауға бағытталған..

Сөз соңында ол факультетке өркендеуді, халықаралық байланыстардың нығая түсуін және бастамалардың табысты жүзеге асуын тіледі.

Іс-шара аясында Артур Ластаев әл-Фараби атындағы ҚазҰУ студенттерімен пікір алмасып, Омбудсмен офисінің қызметі жөнінде айтып, құқық қорғау саласына қатысты сұрақтарға жауап берді.