Адам құқықтары жөніндегі уәкілдің өкілі мен әлеуметтік Омбудсмен өкілінің кездесуі өтті.

ҚР Адам құқықтары жөніндегі уәкілдің Жамбыл облысы бойынша өкілі Қуанышев Еркін Жамбыл облысы бойынша Әлеуметтік омбудсменнің өкілі Ахметова Шолпан ханыммен жұмыс кездесуін өткізді.

Кездесудің мақсаты – азаматтардың құқықтарын әлеуметтік маңызы бар салаларда қамтамасыз ету және қорғау мәселелерін талқылау, сондай-ақ адам құқықтары институттары мен өңірдің әлеуметтік құрылымдары арасындағы ынтымақтастықты нығайту болды.

Кездесу барысында тараптар азаматтардың әлеуметтік қорғау, медициналық және білім беру қызметтерінің қолжетімділігіне қатысты өтініштерін; халықтың шағымдары мен ұсыныстарын қарау тәжірибесін; өңірлік деңгейде құқық қорғау тетіктерін жетілдіру жөніндегі бірлескен шараларды талқылады.

Ерекше назар әлеуметтік осал топтарға құқықтық көмек көрсетуге, әлеуметтік қамтамасыз ету саласындағы құқық бұзушылықтардың алдын алуға, сондай-ақ облыс тұрғындары арасында құқықтық мәдениетті арттыруға аударылды.

Кездесу қорытындысы бойынша тараптар одан әрі өзара іс-қимылды жалғастыру, ақпарат пен тәжірибе алмасу, сондай-ақ азаматтардың құқықтарын қорғау тиімділігін арттыруға бағытталған бірлескен іс-шараларды өткізу жөнінде уағдаласты.