Ақмола облысында заңдылық пен қоғамдық қауіпсіздікті қамтамасыз ету мәселелері бойынша Үйлестіру кеңесінің отырысы өтті

Ақмола облысы бойынша Адам құқықтары жөніндегі уәкілдің өкілі Гульнара Джанбекова Ақмола облысы бойынша заңдылықты, құқықтық тәртіпті қамтамасыз ету және қылмысқа қарсы күрес жөніндегі Үйлестіру кеңесінің жұмысына қатысты.
Іс-шара барысында қатысушылар 2024–2028 жылдарға арналған қоғаммен серіктестікте қоғамдық қауіпсіздікті қамтамасыз ету тұжырымдамасын іске асыру жөніндегі Іс-қимыл жоспарының орындалуына жүргізілген талдау нәтижелерін талқылады. Құқық бұзушылықтардың алдын алу, қоғамдық қауіпсіздікті қамтамасыз ету және халықтың құқықтық мәдениетін арттыру салаларындағы мемлекеттік органдар мен қоғам арасындағы өзара іс-қимылды нығайту мәселелеріне ерекше назар аударылды.
Сонымен қатар, отырыс аясында «Адал азамат» тұжырымдамасын іске асыру, Қазақстан Республикасы Президентінің №1081 Жарлығымен бекітілген ішкі саясаттың негізгі қағидаттары, құндылықтары мен басым бағыттары қаралды.
Кездесуге қатысушылар әйелдердің құқықтары туралы хабардарлығын арттыру, олардың бейбітшілікті, қоғамдық тұрақтылық пен қауіпсіздікті қамтамасыз етудегі, сондай-ақ жанжалдардың алдын алу және оларды реттеу үдерістеріндегі рөлі мен қатысуы мәселелеріне де ерекше назар аударды.
Үйлестіру кеңесінің қатысушылары заңдылықты қамтамасыз етуге, азаматтардың құқықтары мен бостандықтарын қорғауға, сондай-ақ мемлекет пен қоғам арасындағы сындарлы әріптестікті дамытуға бағытталған ведомствоаралық өзара іс-қимылды одан әрі нығайтудың маңыздылығын атап өтті.
Отырыс қорытындысы бойынша қоғамдық қауіпсіздік пен құқықтық тәртіпті қамтамасыз ету саласындағы профилактикалық жұмыстың тиімділігін арттыруға және қойылған міндеттерді іске асыруға бағытталған қосымша шаралар кешені әзірленді.