Ақмола облысы бойынша Омбудсмен өкілі облыстық психиатриялық ауруханаға мониторингтік сапар жасады

Адам құқықтары жөніндегі уәкілдің Ақмола облысы бойынша өкілі Гүлнәр Жанбекова «Еркіндік рухы» жастар құқығы жөніндегі комиссиясының мүшесі Аяулым Дарханбекпен бірлесіп, Зеренді ауданының Алексеевка ауылында орналасқан «Ақмола облыстық психиатриялық ауруханасы» ШЖҚ-дағы МКК-ның стационарлық бөлімшесіне мониторингтік сапар жүргізді. Сапар барысында құқық қорғаушылар санитарлық-гигиеналық режимді, палаталардың жай-күйін, жұмсақ мүлікпен және киім-кешекпен қамтамасыз етілу сапасын, медициналық көмектің қолжетімділігін, тамақтандырудың ұйымдастырылуын, дәрі-дәрмекпен уақтылы қамтамасыз етілуін егжей-тегжейлі зерттеп, сонымен қатар пациенттермен жеке әңгімелесулер өткізді. Мониторинг аясында Гүлнәр Жанбекова аурухана қызметкерлеріне Президенттің № 1081 Жарлығының ережелері мен «Адал азамат» тұжырымдамасының негізгі құндылықтары бойынша мақсатты түсіндіру жұмыстарын жүргізді. Омбудсмен өкілі медициналық қызметкерлердің назарын аталған мемлекеттік стандарттар оларға тікелей кәсіби міндеттемелер жүктейтініне аударды: олар — пациенттердің заңды құқықтарын қатаң сақтау, құқықтық нигилизм көріністеріне жол бермеу, сондай-ақ осал жағдайдағы адамдарға адамгершілікпен қарауды және олардың адамдық қадір-қасиетін құрметтеуді қамтамасыз ету. Қызметтік борышты адал атқару және азаматтық бақылауға ашық болу қоғамдағы өзара сенім мәдениетін қалыптастырудың негізі екені атап өтілді. Мониторинг қорытындысы бойынша облыстық психиатриялық аурухана басшылығына азаматтардың болу жағдайын жақсартуға және пациенттердің құқықтарын қорғау тетіктерін нығайтуға бағытталған егжей-тегжейлі ұсынымдар жолданатын болады.