Қарқаралы ауданының Қарағайлы кентінде ауыз су проблемасы шешіледі
Қарқаралы ауданындағы көп жылдан бері қордаланып келе жатқан өзекті мәселелердің бірі – халықты сапалы сумен қамтамасыз ету. Билік бұл мәселені біртіндеп шешуде. "Жарлы - Қарқаралы" су құбырының құрылысы жалғасуда, нысан биыл тапсырылуы тиіс. Ал Қарағайлы кентінде су құбыры мен кәріз тазарту құрылыстары салынуда.
Қарағанды облысының әкімі Ермағанбет Бөлекпаев Қарқаралы ауданына жұмыс сапарымен барып қайтты. Қарағайлы қаласындағы су құбыры мен кәріз жүйесін салу бойынша жұмыстардың барысын тексеріп, сол жерде тұрғындармен кездесті.
Талды өзенінің жанында сумен жабдықтауға арналған ұңғымалар бұрғыланды. Қазірдің өзінде 35 км желі салынды. Өңір басшысына биыл су құбыры тапсырылады деп мәлімдеді. Кәріз желілері мен тазарту қондырғылары бойынша жұмыстар кесте бойынша жүргізілуде, бұл екі жылдық жоба. Жұмыстарды 2024 жылы аяқтау жоспарлануда.
Су құбырлары Бүркітті және Теректі ауылдарында да салына бастады. Томар және Матақ ауылдарындағы су құбыры желілерін қайта жаңартуға кірісті.
Қарағайлыда сондай-ақ абаттандыру жұмыстары жүргізіліп, көшелер жарықтандырылады. Сонымен қатар, бос тұрған апатты көпқабатты үйлерді бұзу басталды.
Кездесуде қарқаралылықтар жолдардың, әлеуметтік сала нысандарының жай-күйіне қатысты мәселелерді көтерді. Жаттықтырушылар мен бұқаралық спорт залдарының жетіспеушілігіне шағымданды.
Тұрғындарға Қарағанды-Қарқаралы жолының жөндеу жұмыстары жалғасатыны айтылды. Аудан ішіндегі жолдар да ретке келтірілетін болады: Ақтасты-Айрық, Қарабұлақ ауылына кірме жолдар жөнделеді.
Қарағайлы тұрғындары дене шынықтыру-сауықтыру кешенін салуды сұрады. Қарқаралы ауданының әкімі Ерлан Құсайынның айтуынша, жобалық-сметалық құжаттама әзірленуде. Жобаны "Ауыл – Ел бесігі" бағдарламасы бойынша іске асыру жоспарлануда.
- Ауылдың проблемаларын біз білеміз. Олар біртіндеп шешілетін болады. Электр желілері бойынша мәселе бақылауда. Сіздердің өтініштеріңіз бойынша мәдениет үйін жөндейміз, - деді Ермағанбет Бөлекпаев. - Келесі жылы Қарағайлы бағытындағы "Қарқаралы - Қ. Аманжолов" жолына күрделі жөндеу жүргіземіз.
Қарқаралылықтар туризмді дамыту мәселелерін де көтерді. Олар Үлкен көл көлінің жағалауын абаттандыруды ұсынды. Ермағанбет Бөлекпаев аудан әкіміне кәсіпкерлік басқармасымен бірлесіп Қарқаралы ауданында туризмді дамыту бойынша үш жылдық жоспар әзірлеуді тапсырды. Келесі жылы 200 жылдығын атап өтетін Қарқаралының өзінде бірқатар жобаларды жүзеге асыру жоспарланып отыр.
Кездесу соңында Ермағанбет Бөлекпаев азаматтарды жеке мәселелері бойынша қабылдады.