БҚО-да Қазақстан полициясы күніне арналған салтанатты шара өтті
Батыс Қазақстан облысы полиция департаментінде Қазақстан полициясы күніне арналған салтанатты жиын өтті. Мерекелік іс-шараға облыс әкімі, департамент басшылығы, полиция қызметкерлері, сала ардагерлері мен қонақтар қатысты. Жиын ҚР ІІМ министрі Ержан Саденовтің құттықтау жеделхатын оқудан басталды. Салтанатты жиында сөз сөйлеген облыс әкімі полиция қызметкерлерін кәсіби мерекелерімен құттықтап, олардың қоғамдық тәртіпті сақтау мен азаматтардың қауіпсіздігін қамтамасыз етудегі маңызды рөлін атап өтті. Ол Мемлекет басшысының құқық қорғау жүйесін мемлекет тұрақтылығының негізгі кепілі ретінде бағалайтынын айтып, соңғы жылдары ішкі істер органдарында жүзеге асырылған реформалардың оң нәтижелеріне тоқталды. Өңір басшысы бүгінде облыстың ішкі істер органдарында қызмет ететін екі мыңнан астам тәртіп сақшысының кәсіби біліктілігі мен адал еңбегінің арқасында Батыс Қазақстан облысы қылмыстың ашылуы мен профилактикалық жұмыстар көрсеткіші бойынша республикадағы үздік өңірлердің қатарында екенін жеткізді. Сондай-ақ полиция органдарының материалдық-техникалық базасын нығайту бағытында атқарылып жатқан жұмыстар туралы айтылды. Соңғы үш жылда облыстық бюджет есебінен арнайы техникалар сатып алынып, полиция бөлімшелері заманауи құрал-жабдықтармен қамтамасыз етілді. Аудандарда жедел басқару орталықтары құрылып, бейнебақылау жүйелері жаңартылды. Сонымен қатар полиция бөлімдерінің ғимараттарына жөндеу жұмыстары жүргізіліп, қызметкерлердің жұмыс жағдайын жақсартуға ерекше көңіл бөлінуде. Өз кезегінде Батыс Қазақстан облысы полиция департаментінің бастығы Арман Оразалиев жеке құрамды кәсіби мерекемен құттықтап, ардагерлердің құқық қорғау саласын дамытуға қосқан үлесіне алғыс білдірді. Ол қызметтік борышын атқару кезінде қаза тапқан әріптестердің ерлігі ешқашан ұмытылмайтынын атап өтті. Шара барысында Қазақстан Республикасы Ішкі істер министрлігінің, облыс әкімінің және полиция департаменті бастығының атынан үздік қызметкерлер марапатталып, олардың қоғамдық қауіпсіздікті қамтамасыз ету жолындағы еңбегі жоғары бағаланды. Мерекелік жиын соңында полиция қызметкерлеріне мықты денсаулық, отбасыларына амандық және қызметтеріне табыс тілектері айтылды. Салтанатты шара мерекелік концерттік бағдарламамен қорытындыланып, сахнада өңір өнерпаздары мен шығармашылық ұжымдары өнер көрсетті.