БҚО полиция қызметкерлері мектеп оқушыларымен қауіпсіздік сабақтарын өткізді

Батыс Қазақстан облысында «Заң және тәртіп» тұжырымдамасы аясында кәмелетке толмағандардың құқық бұзушылықтарының алдын алу бағытындағы жүйелі жұмыстар жалғасуда. Осы мақсатта облыстық полиция департаментінің қызметкерлері №2 және №3 жалпы білім беретін мектептерінде болып, 5–6 сынып оқушыларымен кездесулер өткізді.

Іс-шара барысында оқушыларға қоғамдық орындар мен жолдардағы тәртіп ережелері, қауіпсіздік техникасын сақтау және өз әрекеттеріне жауапкершілікпен қарау қажеттілігі түсіндірілді. Кездесу кезінде балаларға төтенше жағдайлар туындаған сәтте дұрыс әрекет ету жолдары мен конфликттік жағдайлардың алдын алу бойынша практикалық кеңестер берілді. Арнайы назар қауіпсіз мінез-құлық дағдыларын қалыптастыруға, заңға құрметпен қарауға және қоғам алдындағы жауапкершілікті арттыруға аударылды.

Сонымен қатар, сабақтар барысында полиция қызметкерлері оқушылармен интернеттегі қауіпсіздік тақырыбында әңгіме өткізді. Қазіргі таңда интернет кеңістігі балалар мен жасөспірімдердің өмірінде маңызды рөл атқаратындықтан, олардың жеке ақпараттарын қорғау және онлайн мінез-құлқын бақылау өзекті мәселе болып табылады. Оқушыларға әлеуметтік желілерде жеке деректерді жарияламау, бейтаныс адамдармен байланыс орнатпау, күмәнді сілтемелерге өтпеу және кибербуллинг жағдайында сенімді ересектерге хабарлау қажеттілігі түсіндірілді. Сондай-ақ, интернетті тиімді әрі қауіпсіз пайдалану бойынша нақты мысалдар келтірілді.

Полиция өкілдері интернеттегі жауапкершілік пен қауіпсіз мінез-құлық ережелерін сақтау балалардың жеке қауіпсіздігі мен психологиялық саулығына тікелей әсер ететінін атап өтті. Мұндай кездесулер заңға бағынатын және жауапкершілігі жоғары жас ұрпақты тәрбиелеуге, полиция мен қоғам арасындағы өзара сенімді нығайтуға, сондай-ақ балалар мен жасөспірімдер арасындағы құқық бұзушылықтардың, соның ішінде интернеттегі құқық бұзушылықтардың алдын алуға ықпал етеді.