Оралда “Marvel” кейіпкерлерінің костюміндегі көлік шеруі жол ережесін бұзғаны үшін тоқтатылды

2025 жылғы 15 маусым күні күндізгі уақытта Орал қаласында патрульдік полиция батальонының қызметкерлері бірнеше автокөліктен тұратын автокортежді тоқтатты. Тексеру барысында оның қатысушылары жол жүру ережелерін өрескел бұзғаны анықталды.
Анықталғандай, көлік жүргізушілері мен жолаушылары “Marvel” киноәлемі кейіпкерлерінің костюмдерін киіп жүрген. Алайда ерекше сыртқы келбет олардың жауапкершіліктен босатылуына негіз бола алмайды — барлығына қатысты әкімшілік хаттамалар толтырылды.
Полиция қызметкерлері тарапынан келесі әкімшілік хаттамалар рәсімделді:
• ҚР ӘҚБтК 593-бабының 2-бөлігі бойынша — 11 хаттама (қауіпсіздік белдігін тақпау);
• 590-баптың 5-бөлігі бойынша — 3 хаттама (мемлекеттік тіркеу нөмірлік белгілеріне қойылатын талаптарды бұзу);
• 593-баптың 3-бөлігі бойынша — 1 хаттама (алдыңғы орындықта қауіпсіздік белдігін тақпаған жолаушыны тасымалдау);
• 595-баптың 1-бөлігі бойынша — 1 хаттама (жол қиылыстарынан өту тәртібін сақтамау);
• 590-баптың 2-бөлігі бойынша — 1 хаттама (пайдалануға тыйым салынған техникалық ақаулары бар көлікті басқару).
Батыс Қазақстан облысы Полиция департаменті азаматтарды жол қозғалысы ережелерін мүлтіксіз сақтауға шақырады. Костюмдер мен мерекелік шеру — жолда тәртіпке бағынбауға себеп бола алмайды.
Жол қауіпсіздігі — әрбір азаматтың ортақ жауапкершілігі.