Саналы таңдау – қорғаныс: Талдықорғанда болашақ медицина қызметкерлеріне адам саудасының құрбаны болмау жолдары түсіндірілді

Талдықорған қаласында медициналық бағытта білім алып жатқан студенттерге арналған профилактикалық кездесу өтті. Іс-шара қазіргі қоғамдағы ең жасырын әрі қауіпті қылмыстардың бірі — адам саудасының алдын алуға арналды. Кездесуді Жетісу облысы Полиция департаментінің Ұйымдасқан қылмысқа қарсы күрес басқармасының қызметкерлері ұйымдастырды.

Кездесу әдеттегі дәріс форматынан өзгеше өтті. Құқық қорғау органдары өкілдері студенттермен ашық диалог құрып, мәселені тек теория жүзінде емес, нақты өмірлік мысалдар арқылы түсіндіруге басымдық берді. Әсіресе жастардың тәуекел тобына жиі енетініне назар аударылды. Бұған олардың сенгіштігі, тез табыс табуға немесе шетелде жұмыс істеуге деген ұмтылысы себеп болатыны айтылды.

Студенттерге қылмыстық топтардың әрекет ету тәсілдері жан-жақты түсіндірілді: тартымды жарнамалар жариялаудан бастап, психологиялық қысым көрсету және жәбірленушіні толық бақылауға алуға дейінгі кезеңдер қамтылды.