Бәрін шешетін бір сәт: өмір жолы әрдайым ашық болуы тиіс

Кейде қайғылы жағдай қатты жарылыстан да, үрейлі қоңыраудан да басталмайды — жол жиегінде «бір минутқа» қалдырылған көліктен басталады. Біреуге болмашы көрінген сол әрекет, біреудің өмірін үзіп кетуі мүмкін.

Полиция қызметкерлері жедел медициналық жәрдем бригадаларымен бірлесіп профилактикалық іс-шаралар өткізіп, жүргізушілерге қарапайым, бірақ аса маңызды ережені еске салды: арнайы көлік (жарқылдақ шамдары қосулы және дабыл белгісі берілген кезде) жақындаған сәтте дереу жол беру қажет. Бұл талап — жай формалдылық емес, адам тағдырына тікелей қатысты қағида.

Түсіндіру жұмыстары барысында көлікті дұрыс қою мәдениетіне де ерекше назар аударылды. Рұқсатсыз немесе ыңғайсыз жерге қалдырылған көлік — бұл тек ереже бұзу емес, бұл құтқаруға кедергі. Аула ішінде, кіреберіс маңында немесе тар көшеде бейберекет қойылған автокөлік кейде ең қымбат секундтарды жоғалтуға себеп болады.

Ал дәл сол секундтар бәрін шешеді. Құтқарушылар өрттен адамды алып шығуға үлгермеуі мүмкін. Дәрігерлер шұғыл көмекке мұқтаж науқасқа жете алмауы мүмкін. Полицейлер құқық бұзушыны дер кезінде тоқтата алмай қалуы мүмкін.