Жетісу облысының полициясы бақылауды күшейтуде: аулалардан түнгі орындарға дейін

Полиция қызметі — бұл тек құқық бұзушылықтарға ден қою емес, ең алдымен жүйелі профилактика, халықпен тұрақты байланыс және қоғамдық қауіпсіздікті қамтамасыз етуге әрдайым дайын болу. Жетісу облысында бұл жұмыс күшейтілген форматта жүргізіліп, басшылықтың жеке бақылауында.

Облыстың бас полицейі Сарқытбай Құсаинов жеке құрамның гарнизондық саптық тексерісін өткізіп, бөлімшелердің қызметке дайындығын тексерді. Ерекше назар тәртіпке, қызметкерлердің сыртқы келбетіне, қажетті құрал-жабдықтардың болуына және жалпы жауынгерлік әзірлікке аударылды.

Жұмыс сапары Талдықорған қаласының аулалық аумақтарынан басталды. Сарқытбай Құсаинов тұрғындармен кездесіп, олардың өтініштері мен ұсыныстарын тыңдады. Көтерілген мәселелердің барлығы бақылауға алынып, жауапты қызметтерге нақты тапсырмалар берілді.

Одан әрі қала көшелеріндегі патрульдік қызметтің ұйымдастырылуы тексерілді. Бағыттар, нарядтардың тығыздығы, қызметкерлердің өзара іс-қимылы және кез келген құқық бұзушылыққа жедел әрекет ету дайындығы бағаланды.

Жастар көп жиналатын орындарға ерекше назар аударылды. Осы мақсатта «Статус» түнгі клубы тексерілді. Қауіпсіздік қызметінің жұмысы, оның ішінде бейнетіркегіштер мен бейнебақылау жүйелерін пайдалану деңгейі зерделенді. Мұндай орындарда жастардың қауіпсіздігін қамтамасыз ету — басым бағыттардың бірі екені атап өтілді.

«Біздің басты міндетіміз — азаматтардың қауіпсіздігі. Біз тек оқиғаға әрекет етпей, оның алдын алуға жұмыс істеуіміз керек. Халықпен тығыз байланыста болып, олардың мәселелерін дер кезінде шешу — әрбір полиция қызметкерінің міндеті», — деді Сарқытбай Құсаинов.

Жүргізіліп жатқан шаралар Жетісу облысы полициясының алдын алу бағытында жүйелі жұмыс жүргізіп, өңірдегі қауіпсіздік деңгейін арттыруға бағытталғанын көрсетеді.