Жетісу облысы Полиция департаментінде азаптаудың алдын алу шаралары талқыланды

Жетісу облысы Полиция департаментінде Өзіндік қауіпсіздік басқармасының бастамасымен азаптаудың және анықтау мен тергеу барысында тыйым салынған өзге де әдістердің алдын алу мәселелеріне арналған жедел кеңес өтті.

Іс-шараға облыстық прокуратураның басшылығы мен жеке құрамы, Полиция департаментінің жедел және тергеу жұмыстары жөніндегі басшылығы, жедел және тергеу қызметтерінің жетекшілері, сондай-ақ қала және аудан прокурорлары қатысты. Өңірдегі полиция басқармалары мен бөлімдерінің жеке құрамы бейнеконференцбайланыс жүйесі арқылы қосылды. Кеңес жұмысына Жетісу облысы бойынша Адам құқықтары жөніндегі уәкілдің өкілі де қатысты.

Кеңес барысында облыстық прокуратура қызметкерлері баяндама жасап, азаптаудың алдын алу және оған жол бермеу бағытында қабылданып жатқан шаралар туралы ақпарат берді. Адам құқықтары жөніндегі уәкілдің өкілі азаматтардың құқық қорғау органдары қызметкерлері тарапынан тыйым салынған әдістердің қолданылуы мүмкін деген шағымдарын қарау тәжірибесіне тоқталды.

Сонымен қатар, қала және аудандық полиция басқармалары мен бөлімдерінің басшылары қызметтік қызметте заңдылықты қамтамасыз ету бағытында атқарылып жатқан жұмыстар туралы есеп берді. Талқылау қорытындысы бойынша ведомстволық бақылауды күшейту және қызметкерлердің құқықтық сауаттылығын арттыруға бағытталған қосымша шаралар айқындалды.

«Азаптауға және кез келген қатыгез қарым-қатынас түрлеріне жол бермеу — полиция қызметіндегі сөзсіз басымдық. Әрбір қызметкер азаматтардың құқықтары мен бостандықтарын сақтаудағы жеке жауапкершілігін нақты сезінуі тиіс», — деп атап өтті кеңеске қатысушылардың бірі.

#заңментәртіп🚨
#жетісуоблысы
#полиция