Есірткі орнына – күлкі: Талдықорғанда нашақорлыққа қарсы КВН ойыны өтті

Талдықорған политехникалық колледжінде студенттер арасында «Көңіл-күйді есірткі емес, күлкі көтерсін» тақырыбында әсерлі әрі тәрбиелік маңызы зор КВН ойыны өтті. Іс-шараны Халықаралық нашақорлыққа қарсы күрес күніне орай Жетісу облысының Білім басқармасы мен Жетісу облысы ПД Есірткі қылмысына қарсы іс-қимыл басқармасы бірлесіп ұйымдастырды.

Шараның басты мақсаты – жастарға есірткінің зияны туралы ақпарат беріп қана қоймай, оларда өмірге деген саналы көзқарас қалыптастыру, салауатты өмір салтына деген қызығушылықты арттыру және зиянды әдеттерге қарсы балама ретінде юморды насихаттау болды.

Ойын барысында қатысушылар өз азаматтық ұстанымдарын білдіріп, өткір әлеуметтік мәселелерді көтерді, қатарластарына сергек болуға, зиянды заттардан бас тартуға үндеді. Күлкі, шынайы эмоциялар мен шығармашылық көзқарас бұл шараны есте қаларлық қылып қана қоймай, нағыз профилактикалық мәні бар іс-шараға айналдырды.

Мұндай бастамалар мемлекеттік құрылымдар мен білім беру ұйымдарының есірткі қатеріне қарсы бірлескен жұмысының маңыздылығын көрсетеді. Себебі ертеңгі қоғамның құндылықтары дәл осы жастар ортасында қалыптасады.