Жамбыл облысында ірі көлемде гашиш тасымалдаған ер адам ұсталды

Жамбыл облысында ірі көлемде гашиш тасымалдаған ер адам ұсталды

Жамбыл облысы ПД Есірткі қылмысына қарсы іс-қимыл басқармасы, кинолог мамандары және Қордай аудандық полиция бөлімінің қызметкерлерімен бірлесіп жүргізген жедел-іздестіру іс-шаралары барысында есірткі заттарының заңсыз айналымының жолы кесілді.

«Қордай – Шу» автожолының 34-шақырымында полицейлер 59 жастағы азамат басқарған Audi маркалы автокөлікті тоқтатты. «Макс» қызметтік-іздестіру итімен көлік құралын тексеру барысында алдыңғы қақпақ астынан ерекше иісі бар өсімдік тектес зат салынған полипропилен қап табылып, тәркіленді.

Сараптама қорытындысына сәйкес, тәркіленген зат жалпы салмағы 3 келі 947 граммды құрайтын «гашиш» есірткісі екені белгілі болды.

Аталған дерек бойынша Қазақстан Республикасы Қылмыстық кодексінің 297-бабы 3-бөлігімен сотқа дейінгі тергеп-тексеру басталды.

Күдікті ұсталып, Қордай аудандық полиция бөлімінің уақытша ұстау изоляторына қамалды.

Есірткі заттарын тарату арналарының жолын кесу бағытындағы жұмыстар тұрақты негізде жалғасуда.