Күнделікті қызметтен тыс бір күн

Күнделікті қызметтен тыс бір күн

Кейде ұжымның бірлігін арттыру үшін қызметтік кабинеттерден, телефондардан және әдеттегі жұмыс ырғағынан тыс бірге уақыт өткізу жеткілікті.

ШҚО ПД Әкімшілік полиция басқармасының, көші-қон қызметінің және қоғамдық қауіпсіздік басқармасының қызметкерлері қала сыртына шығып, бірлескен тимбилдинг өткізді. Кездесуді қызметтерге жетекшілік ететін ШҚО ПД бастығының орынбасары, полиция полковнигі Рифхат Тауфиков ұйымдастырды.

Жиналыстар мен қызметтік тапсырмалардың орнына қатысушыларды командалық ойындар, конкурстар мен эстафеталар күтіп тұрды. Әріптестер төрт топқа бөлініп, тапқырлықты, шапшаңдықты, ептілік пен өзара көмекті талап ететін тапсырмаларда бақ сынасты.

Бұл күні бәрі болды: бәсекелестік рухы, жанкүйерлердің қолдауы, күтпеген жеңістер мен шынайы күлкі. Бірі өзін нағыз стратег ретінде көрсетсе, енді бірі жылдамдығымен көзге түсті. Ал кейбіреулері командасына соңына дейін берілмеуге көмектесті. Мұнда нәтижеден бұрын бірге өткізген уақыт, жақсы көңіл-күй мен еркін әңгіме маңыздырақ болды.

«Қызмет барысында біз әрдайым жинақы болуға, жұмыс міндеттерін шешуге үйренгенбіз. Осындай кездесулер жұмыстан сәл сергіп, әріптестермен бейресми жағдайда араласуға және оларды басқа қырынан тануға мүмкіндік береді. Бұл бір-бірімізді жақсырақ түсініп, ұйымшылдықты арттыруға көмектеседі», — деді Рифхат Тауфиков.

Қала сыртында өткен күзгі күн қызметкерлерге тынығып, күш жинап, жұмыс ортасынан тыс жерде араласуға жақсы мүмкіндік болды. Сонымен қатар бірге уақыт өткізіп, әріптестерін жаңа қырынан тануға жол ашты.

 

ШҚО ПД баспасөз қызметі