Шығыс Қазақстанда «Жаңа Жол» акциясы басталды

Шығыс Қазақстанда «Жаңа Жол» акциясы басталды

13–30 шілде аралығында Шығыс Қазақстан облысында «Жаңа Жол» профилактикалық акциясы басталды. Оның басты мақсаты — қайталама қылмыстардың деңгейін төмендету ғана емес, сонымен қатар полицияның профилактикалық есебінде тұрған азаматтарға жан-жақты қолдау көрсету.

Қайталама қылмыстардың алдын алу — бұл тек құқық қорғау органдарының емес, әлеуметтік қызметтердің де бірлескен кешенді жұмысын талап етеді. Акция аясында ведомствоаралық жұмыс тобы құрылды. Оның міндеті — бұрын қателескен азаматтардың қайтадан құқық бұзушылыққа баруына себеп болатын факторларды жоюға көмектесу.

Мамандар келесі бағыттар бойынша нақты көмек көрсетеді:

• Құжаттандыру: жеке куәлік алуға және тұрғылықты жері бойынша тіркелуге жәрдемдесу.
• Жұмыспен қамту: халықты жұмыспен қамту органдарына есепке қою, жұмысқа орналастыру және кәсіби оқыту.
• Әлеуметтік мәселелер: әлеуметтік төлемдер, жәрдемақылар мен субсидиялар алу бойынша кеңес беру.
• Денсаулық және тұрмыстық жағдай: медициналық көмек көрсету және баспана мәселелерін шешуге жәрдемдесу.
• Психологиялық қолдау: отбасылық байланыстарды қалпына келтіруге бағыт-бағдар беру, қажет болған жағдайда психологтардың көмегіне жүгіну және дағдарыс орталықтарына жолдама беру.

«Жаңа Жол» — өмірін өзгерткісі келетін және мемлекет тарапынан кәсіби қолдау алуға дайын азаматтар үшін үлкен мүмкіндік. Мұндай кешенді тәсіл құқықтық тәртіпті бақылауға ғана емес, қиын өмірлік жағдайға тап болған жандарға нақты көмек көрсетуге мүмкіндік береді.

 

ШҚО ПД баспасөз қызметі