ШҚО полицейлері мас жүргізушіні дер кезінде тоқтатып жол апатының алдын алды

ШҚО полицейлері мас жүргізушіні дер кезінде тоқтатып жол апатының алдын алды

20 наурыз күні түн ортасында Өскемен – Семей тасжолының 45-шақырымында, Таврия ауылынан шыға берісте патрульдік полиция батальонының қызметкерлері қызмет атқару барысында Toyota Carina E автокөлігін тоқтатқан.

Көлік тізгінінде 37 жастағы жүргізуші болған. Тексеру кезінде полицейлер оның мас екендігінің айқын белгілерін байқайды — ер адамнан ішімдіктің өткір иісі шығып тұрған. Медициналық куәландыру күдікті растады: жүргізушінің қан құрамында мөлшері 2 промиллеге жуық алкоголь болған.

Полиция қызметкерлерінің дер кезінде жасаған іс-қимылының арқасында жолдағы ықтимал қауіпті жағдайдың алдын алу мүмкін болды.

Тәртіп бұзушыға қатысты Қазақстан Республикасы Әкімшілік құқық бұзушылық туралы кодексінің 608-бабы 1-бөлігі бойынша әкімшілік хаттама толтырылды. Автокөлік Өскемен қаласының арнайы тұрағына қойылды.

Шығыс Қазақстан облысының Полиция департаменті көлікті масаң күйде басқару — жай ғана заң бұзушылық емес, адамдардың өмірі мен денсаулығына төнген нақты қауіп екенін еске салады.

Тәртіп сақшылары жүргізушілерді жауапты болуға шақырады, өйткені жол қателікті кешірмейді.

 

ШҚО ПД баспасөз қызметі