ШҚО тұрғыны 20 жылдан кейін жеке куәлігіне қол жеткізді

ШҚО тұрғыны 20 жылдан кейін жеке куәлігіне қол жеткізді

Шығыс Қазақстан облысы Полиция департаментіне Алтай ауданының тұрғыны Аксенова Ольга Николаевнадан алғыс хат келіп түсті. Өз хатында ол көші-қон қызметінің мамандарына көрсеткен бейжайлылығы мен жоғары кәсібилігі үшін шынайы ризашылығын білдірді.

Бұл оқиғаның кейіпкерлері — полиция майоры Уәлиева Миргүл Дүйсенбайқызы мен бас маман Аленова Әсел Назымбекқызы . Оларға 20 жылдан астам уақыт бойы ешқандай құжатсыз өмір сүріп келген қарт кісі көмек сұрап келген. Қарияның не меншікті баспанасы, не қолдау көрсететін жақын туыстары болмаған.

Жағдайдың күрделілігіне қарамастан, көші-қон қызметінің қызметкерлері өтінішке жедел үн қатты. Олар іс-қимыл тәртібін егжей-тегжейлі түсіндіріп, қажетті құжаттарды жинауға көмектесті және оны қалпына келтіру процесін соңына дейін сүйемелдеді. Соның нәтижесінде, ондаған жылдар бойы құқықтық кеңістіктен тыс қалған ер адам ақыры Қазақстан Республикасы азаматының мәртебесін растай алды.

— Мұндағы ең маңыздысы — қарапайым адами қарым-қатынас. Осындай парасатты жандарды тәрбиелеген ата-анасына мың алғыс, — деп атап өтті Ольга Николаевна.

Полиция қызметкерлері үшін бұл — күнделікті жұмыс. Алайда көп жылдар бойы құжатсыз жүрген адам үшін бұл сәт өмірінің жаңа парағын бастауға мүмкіндік берді.

ШҚО ПД баспасөз қызметі