ШҚО полициясы ірі көлемдегі есірткі курьерін ұстады

                                                                                           ШҚО полициясы ірі көлемдегі есірткі курьерін ұстады

Жедел іздестіру іс-шаралары барысында Шығыс Қазақстан облысы Полиция департаментінің Есірткі қылмысына қарсы іс-қимыл басқармасының қызметкерлері тыйым салынған интернет-дүкеннің «қойма-ораушысы» ретінде әрекет еткен 2006 жылғы Алматы облысының тумасын анықтап, ұстады.

Күдіктінің тұрған жалдамалы пәтеріне санкцияланған тінту жүргізу кезінде ақ түсті ұнтақ тәрізді зат салынған 5 полимерлі пакет және өсімдік тектес заты бар 2 полимерлі пакет табылып, тәркіленді.

Сараптама қорытындысына сәйкес, тәркіленген психотроптық заттардың жалпы салмағы 495,32 грамды құрады.

Тергеу барысында ұсталған азаматшаның мессенджерлердің бірі арқылы есірткі таратушы болып жұмысқа орналасқаны, сол жерде өзіне тапсырмалар беріп отырған белгісіз куратормен хат алмасқаны белгілі болды.

Аталған факті бойынша сотқа дейінгі тергеп-тексеру жүргізілуде. Ұсталған тұлға уақытша ұстау изоляторына қамалды.

ШҚО полициясы ескертеді: интернет арқылы жастарды есірткі таратуға тарту — қауіпті жағдай. Есірткі таратушы ретіндегі кез келген «жеңіл табыс» міндетті түрде қылмыстық жауапкершілікке әкеліп, болашаққа балта шабады. Полиция департаменті жасөспірімдер мен жастарды сақ болуға және мұндай ұсыныстарға алданбауға шақырады.


                                                                                                                                                                                                             ШҚО ПД баспасөз қызметі