Төрт құтқарылған өмір: Жезқазғандық полицейдің оқиғасы

Жезқазғанда Ахмет Балғабайдың есімі үміттің символына айналды. Біреулер оны жоғары деңгейлі кәсіби маман деп атайды, ал өзі құтқарған адамдар оны өздерінің қамқоршы періштесі санайды. Ішкі істер органдарындағы 15 жылдық қызметі барысында ол нағыз полицей үшін ерлік — саналы таңдау екенін талай рет дәлелдеді, деп хабарлайды Polisia.kz.

Соңғы оқиға 6 сәуірде болды. Сағат 22:27-де кезекші бөлімге Раскова көшесінде бір ер адамның үшінші қабаттың терезесінен салбырап тұрғаны туралы хабар түсті. Полицей оқиға орнына жеткенде жағдай өте қауіпті еді — адам жақтаудан әрең ұсталып тұрған. Есікті бұзып кіру көп уақыт алатынын түсінген ол дереу әрекет етуге шешім қабылдады. Төменгі қабаттағы көршілерге көтерілді. Екінші қабаттағы пәтер иелері ес жиып үлгермей жатып, полицей олардың үйіне кіріп кеткен еді. Ахмет терезені ашып, қорғаныс торын алып тастап, әріптесімен бірге ер адамды құлап кетерден бір сәт бұрын ішке тартып алды.

2020 жылдың мамыр айында криминалист болып жүрген кезінде ол құлап кетудің алдында тұрған қызды құтқарды: төртінші қабаттағы көрші терезеден шығып, ғимараттың сыртқы бөліктерімен жүріп, дер кезінде оған жеткен.

2024 жылдың тамызында Сәтбаев көшесімен өтіп бара жатып, көпір қоршауынан асып тұрған қызды байқайды. Полицей онымен байланыс орнатып, жедел түрде қауіпсіз жерге алып шықты.

31 наурыз күні Ахмет Бейбітшілік  көшесіндегі өртеніп жатқан үйден тұрғындарды эвакуациялауға қатысып, әріптестерімен бірге түтінге толы бөлмеден ер адамды құтқарып қалды.

Қоғамның назарында болғанына қарамастан, полицей Балғабай қарапайымдылығын сақтап келеді.
— Бұл менің азаматтық борышым және халыққа берген антым, — дейді ол.

Бүгінде ол Жезқазғанның патрульдік полициясында қызметін жалғастырып, жас қызметкерлерге үлгі болып, әрбір шақыртудың артында адам өмірі тұрғанын еске салып келеді.