Полиция қарияның ұрланған телефонын қайтарып берді

Жедел-іздестіру іс-шаралары барысында Шардара аудандық полиция бөлімінің қызметкерлері ұрлық қылмысына қатысы бар деген күдікпен 32 жастағы күдікті ер адамды анықтады.

Белгілі болғандай, күдікті жәбірленушінің танысы болып шықты. Оңай олжа таппақ болған ол жалғысбасты қарияның үйіне келіп, онымен бірге ішімдік ішкен. Қарт кісінің ұйықтап кеткен сәтін күткен күдікті үстел үстінде тұрған ұялы телефонын жымқырып, оқиға орнынан тайып тұрған.

Осылайша қолды қылған телефонды сатып жібермек болған. Алайда полиция қызметкерлерінің жедел іс-қимылдарының арқасында мүлік тәркіленіп, заңды иесіне қайтарылды.

Қазіргі таңда күдіктінің бұдан басқа да қылмыстарға қатыстылығы тексерілуде.