Түркістан облысында нашақорлықпен күрес айлығының қорытынды жиыны өтті

 

Түркістан қаласында «Халықаралық нашақорлыққа және есірткінің заңсыз айналымына қарсы күрес күніне» орай бір ай бойы өткізілген іс-шараның қорытынды жиыны өтті. Маңызды шараға Түркістан облысы Полиция департаменті бастығының орынбасары Арман Бейсенбаев, есірткі қылмысына қарсы кеңес мүшелері, облыс жастары мен қонақтары, жалпы барлығы 300-ге жуық адам қатысты.

Ұйымдастырушылар өз сөздерінде жастардың есірткіге қарсы иммунитетін қалыптастыруда профилактикалық шаралардың маңыздылығын атап өтті. Сондай-ақ іс-шарада белгілі әншілер, облыс ансамбльдері мен жас спортшылар өнер көрсетті. Сахна төрінде патриоттық рухтағы әндер шырқалып, есірткіге қарсы драмалық көрсетілімдер ұйымдастырылды.

Ал Есірткі қылмысына қарсы іс-қимыл басқармасының қызметкерлері жастарға есірткіні қолданудың зияны туралы ескертіп, осындай құқық бұзушылықтар үшін жауапкершілік қарастырылғанын жеткізді.

Сонымен қатар Полиция департаменті басшылығы «Біз есірткіге қарсымыз» ұранымен түрлі сайыстар мен спорттық іс-шараларда жүлделі болған жастарымызға бағалы сыйлықтар үлестірді. Ал есірткіге қарсы күреске шараларына белсенді қатысқан нарколог мамандары, жергілікті атқарушы орган қызметкерлері мен кеңес мүшелері генерал-майор Мұрат Қабденовтың Алғыс хатымен марапатталды.

Жалпы мақсат-өскелең ұрпақтың есірткіге деген теріс көзқарасын қалыптастыру, жастарды нашақорлық пен есірткі бизнесіне қарсы тұруға және салауатты өмір салтын ұстануға шақыру.