Бұл туралы Көліктегі полиция департаментінің бастығы Оңал Бекеев хабарлады.
Оның айтуынша, Алматы қаласының әуежайында қаңтар айындағы оқиғалар кезінде жасалған қылмыстарды тергеумен айналысатын Көліктегі ПД-нің жедел-тергеу тобы бейнебақылау камераларының жазбаларын зерттеу барысында Алматы қаласында тұратын Жамбыл облысының 24 жастағы тумасын анықтап, ұстады.
«Ұсталған азаматтың ағымдағы жылғы 5 қаңтарда тәртіпсіздіктердің басқа қатысушыларымен бірге қару-жарақ дүкенінен қару ұрлап, Алматы қаласының әуежайына қарулы шабуыл жасағандығы, содан кейін сыбайластарымен бірге Алматы қаласы полиция департаментінің ғимаратына барғаны анықталды. Митингке қатысушылармен бірге полиция департаментінің ғимаратын таңғы сағат 6-ға дейін қоршауда ұстаған», - дедi полиция генерал-майоры.
Бұдан соң ол ұрланған қаруды белгісіз тұлғаға 40 мың теңгеге сатып жіберген.
«Қазiр ұсталған азаматқа қатысты күзетпен ұстау түріндегі бұлтартпау шарасы санкцияланды. Тергеу амалдары жүргізілуде», - деді ведомства басшысы.
Көліктегі полиция департаментінің баспасөз қызметі